يا مْحَمّلٍ موتَرْكِ فوقِ احتماله عرّضْتِ نفْسكْ والبشر للمخاطر

يا راعي الدنا تماديت وأخطيت
الحمل زايد والعواقب خطيره
أحذر إلى منك مع الخط لفيت
إن كنت في صحراء او انك بديره
خلك فطين كل ما أصبحت وأمسيت
ترى الطمع يا خي يعمى البصيره
علي الرشيد - رياض الخبراء
حمل التبن زايد وبه شتى الاخطار
للدرب والسايق وضد الأنظمه
ترى الطمع ياكم جنى لَكْ من أضرار
فيه الخساير .. والنتايج مؤلمه
ولا تقول لا شرطي ولا فيه رادار
فكِّر بربك والنظم .. والسلامه
كل الأمور موضحه مَا بِهْ اعذار
إذكر ترانا في زِمَانْ العولمه
سعود عائش الحربي - جدة
يا ربّ تسْتر من فُعُولِ الجهاله
أهل الغلط اللي بِفِعْلِهْ تكابر
يا مْحَمّلٍ موتَرْكِ فوقِ احتماله
عرّضْتِ نفْسكْ والبشر للمخاطر
كلٍّ يبي بالدّرب يأخذ مجاله
عِرْفك بحَقّ الغير لا يْصيرِ قاصر
عمْرِ النّدَم ما ردّ أبّ لْعياله
لا صار بأسبابك طريح المقابر
كم واحدٍ يرثى لوضعه وحاله
من حادثٍ دهْوَرْهِ مكْسورِ خاطر
لا تعتقد إنّ التهاون شكاله
عن الخطا ارجعْ ما دمت قادر
ناصر جمعان آل عوض - وادي الدواسر
اللي فعل هالفعل كم فيه الاخطار
بالفعل ضايع والنتيجه خطيره
يحتاج له تأديب ولانقبل اعذار
ثم موتره يسحب ويمنع مسيره
محمد عبدالعزيز الخنيفر - أشيقر
خطا على اللي زوّد الحمل بالحيل
والمنظر اللي شفت ليس ابحضاري
أكبر دليلٍ شوفت الحمل به ميل
يمكن عليه ايطيح بأي الكباري
في ما مضى كنّا على البل والخيل
واليوم طياره.. وبنز.. ولواري
ف اشكر إله الكون شكراً جزيل
بالشكر يبقى الخير عالناس جاري
محمد عبدالله الشهري - رجال المع
مايصير اللي نشوفه مايصير
هذا فعل محذور لا تتركونه
يا امننا تكفون ذا فعله خطير
هذا ومثيله واجبٍ تمنعونه
ريان محمد الخنيفر
يا رب سترك لا تصير الحوادث
حملٍ ثقيل وزايدٍ حيل بالحيل
في كل يوم نشوف زود الكوارث
ليه المخاطر؟ ليه العنا والبهاذيل؟
سطام المسردي - الرياض
نرحب بمشاركاتكم الشعرية وما تلتقطه عدساتكم
من الصور الهادفة والطريفة على إيميل الخزامى:
rb-khozama@alriyadh.com
صورة العدد ( عدسة / عزام الحميضي )