صوت الصورة

مقرود يا محمّل السّكراب
ما حدّك الله على شيله
الرّزق ربّي فتح له باب
والجيب يا كود تنزيله
طريق برّي وفيه اتراب
الله مع اللي سرى ليله
عبدالكريم عبدالرحمن السلّوم - القرائن
حمّلتها حملٍ ترى ما تطيقه
العفش واجد والثقل صار بالكار
نقلٍ صغيرٍ والحمل ذا يعيقه
يا راعي الهلي مخالف وتحتار
ومخاطرٍ بالنفس هذي حقيقه
حذراك تمشي مع خطوط ومع قار
عبدالمحسن محمد المحيسن - رياض الخبراء
يا راعي الهلي ترى الحمل زايد
ارهقتوا الهلي وهي مابها حيل
عفش وصوان وفوق هذا مساند
ومويتر مشخص على بودي الهيل
يا خوي خاف الله ترى الوضع كايد
ماصنعت الهلي لذا الحمل والشيل
وان شافك الشرطي تسوقه بسايد
سجن وغرامه وأنت حضك به الميل
عبدالكريم النغيمشي - لوذة
راعي ونيتٍ حمّل العرض والطول
مع زود حمله حمّل الموتر صغير
عمالةٍ سارت على الأرض وتجول
في كل حزّه تسلك الخط وتغير
واللي تطرف عده اليوم محمول
ولا تبالي بالخطر عندها غير
تكاثرت من كل حولٍ إلى حول
ولاحدٍ يسائل يا ولد وين وتسير
حمد عبدالله الوايلي - حوطة سدير
وين أنت رايح يا بعد كل مغليك
يا راعي الهلي عساها سهالات
موتر على موتر عسى الله يقويك
العفش واجد والمسافه .. مسافات
في وسط صحراء كل ابوها تهاليك
الوقت حامي والحذر له علامات
يا رجل أرفق لا تغرّك هقاويك
وأضبط حسابك لا تضيع الحسابات
خالد ناصر المخيمر - روضة سدير
ما تجي الدنيا على ما نبتغي
قلتها من بعد درس وتجربه
ودنا نْصَدِّق ولكن ما تجي
صورةٍ فيها فنون الدبلجه
منظرٍ منه المشاهد يعجبي
لو يصير يكون ضد الأنظمه
كيف هايلكسٍ عليه مْركَّبي
موترٍ يوزن كثير الأوزنه
في صحارٍ قلِّ فيها المطعمي
كم هلك شخصٍ بها الله يرحمه
ناصر جمعان آل عوض - وادي الدواسر
هذي دلالة حمل ما هوب ينطاق
حملٍ ثقيل ولا به أحدٍ يجازيه
أنا أشهد إنك طيّب وعندك أخلاق
موتر رفيقك ضمن عفشك وباقيه
الدرب قدمك لكن الدرب لك شاق
فيه الصعوبة وانتبه وأنت تمشيه
محمد عبدالعزيز الخنيفر - أشيقر
سيارةٍ مشيولةٍ فوق سياره
حملةٍ ما هي للأعيان معهوده
وكل مقبولٍ تجي له أماره
وما خالف المقبول ما فيه فوده
سعود عائش الحربي - جدة
لو افترضنا ان النقل حملته طن
وشلون يقوى العفش والجيب فوقه
بالفوتشوب مطبق الصوره بفن
ومن صمم التطبيق تحفظ حقوقه
اﻻ اذا خف الوزن منه فكن
مكينته والقير ماشٍ يعوقه
سعود عبدالعزيز الهزاع - نعام
هذا حمل يا ناس ما هوب معقول
ما بقي إلا تنقل اليوم موترك
من شاهده أصبح اليوم مذهول
ليت المرور بفعلك اليوم يوقفك
هذي رسالة وافهم العلم والقول
الرفق مطلب ياعسى الرب يحفظك
ريان محمد الخنيفر
صورة العدد السابق