الطير في جو السما فوقه الطير شاله وفوق الراس حمله خفيفي

يا طير ياللي معتلي فوقك الطير
يفل ريشك كود يلقى معيشه
سبحانه اللي جاعلٍ رزقها غير
بالجو واقع بين جلده وريشه
توالف الطيرين بين وله سير
ولونها في طبعها هي وحيشه
مصالح تبدي على كل تيسير
الله خلقها في قلوب هشيشه
حمد عبدالله الوايلي - حوطة سدير
الطير في جو السما فوقه الطير
شاله وفوق الراس حمله خفيفي
كنّه مع الصوره على حزّة عصير
واضن من يسمع سمع له رفيفي
حتى المصوّر فايز بكل تقدير
هو محترف ماشفت مثله وصيفي
سليمان عبدالعزيز السنيدي - الرياض
الجو صافي والحراره شديده
اقول انا مسؤول مهما تسيري
انا موكل وكل مخطي اصيده
وانا وراك اليوم مهما يصيري
واقول فكر في حياةٍ جديده
ترى الزمن معروف وقته قصيري
واللي ترى مكتوب الله يريده
وموقفك حذرا لايجي لك عسيري
محمد عبدالعزيز الخنيفر - أشيقر
يا طير ماهزَّك صغيرٍ على ظهرك
تشهد بسطوتك السما .. والبريّه
صورتك وسط الرسم ماهِيْ بقدرك
غابت من الصوره مواري قويّه
إن كان فرخك فالامر زينٍ وابْرك
البِرْ واجب دايم أجمل وصيّه
العين والمخلب وجنحانٍ وصدرك
أتنومس الصقار صقر .. وخويّه
سعود عائش الحربي - جدة
النسر في جو السماء يدور الصيد
حامل على ظهره صغيرٍ عوينه
فكره مع اللي بالشغايا ملا بيد
يبي الغداء والا العشاء من يمينه
شايل صغيره يدربه يالاجاويد
يمشي على هونه عليه السكينه
ما شال هم العيش حجز المواعيد
له مخلبٍ تدعي الفريسه عجينه
خالد ناصر المخيمر - روضة سدير
عجايب الدنيا ومصورين الفضاء
الطير فوق الطاير والداب يومي به
يازين تصوير الفضاء ياحلو الفضاء
والكل ما ياخذ الا نصيبه
شجعان العتيبي - الرياض
يا اطير انا مرتاح ولانيب خوّاف
انا معك بكل موقع مخاويك
الارض اقرب لك ولابيننا خلاف
انا اشهد انك طيباتٍ مجانيك
ياحر انا احبك ولاصرت مضياف
هذي صداقه به تناجي واناجيك
عهد الوفا معروف من عهد الاسلاف
ولا لي كلامٍ غير الله يحييك
ريان محمد الخنيفر
الطير يحمل طير في عالي الجو
في رحلةٍ فيها مخاطر قويّه
وسط السما يا رب سترٍ من النو
ويعود سالم ما تجيه الأذيه
سطام المسردي - الرياض
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
صورة العدد السابق