حُبّ التصافي دايمٍ بين الاخيار جمعة وفاء ما بينهم مستديمه

اللعب بالكيرم تغيّب من سنين
تاريخ وقته بالتحدّي لعبناه
ينحط فوقه بودرٍ كنه طحين
يسهّل طريق حبوب تضرب لمرماه
بمضراب لو طاح بغلط تدفع الدين
غرامته بالعد ما اذكر نسيناه
كرسيه مركى وينلعب فالدواوين
شباب ذاك الجيل البيت منصاه
سعود عبدالعزيز الهزاع - نعام
يا زين الماضي وأيامه
حتى في النوم وأحلامه
وذيك الطفولة البريه
وعاداتٍ ترفع الهامه
اللعب فيهن متنوع
في البيت ونلعب قدامه
لعبة حبشة وعظيم ساري
وأقدمها بكعوب عظامه
والبعض يلعب بالدنينه
أو سبع أحجار وغمامه
ألعابٍ دايم مأمونه
ومامنها أضرارٍ هدامه
تجمعنا ولا تفرقنا
وقلوب تحن كالحمامه
نلعبها عصير إلى المغرب
وللمسجد نسبق إمامه
صالح علي المبارك - حوطه سدير
النفس لها حق يا ابن الاجواد ترتاح
لا صار وقتك دايم الدوم مشغول
انسى الهموم وزوّد افراح بافراح
لا تلفت للي مضى دون محصول
خالد ناصر المخيمر - روضة سدير
حُبّ التصافي دايمٍ بين الاخيار
جمعة وفاء ما بينهم مستديمه
جلساتهم فيها القصص زين الاشعار
احيوا السنين الماضيه والقديمه
واللي يسولف في حسينات الاخبار
سوالف فيها العلوم السليمه
محمد عبدالعزيز الخنيفر - أشيقر
ماينسى كيرم وشطرنج يا أصحاب
كانت لها يا حمود شنّه وقيمه
بسيطةٍ تلعب على فرش وتراب
لعبة ذكا ما بين ناسٍ حشيمه
لازم لها بتراثنا يعمل إحساب
وتشجيعها تشجيع لأهل العزيمه
سعود عائش الحربي - جدة
ما مضى لِيتهْ بِيُومٍ لو يجود
من زمان الطيب يعطينا صباح
مير هيهات الزمن لحظه يعود
حِلْوِ أيامه مَعَ الغالينِ راح
وينهم أهلٍ مضو وين الجدود
فَقْدهم خَلّف لنَا أحزانِ وْجِراح
راحت أيامٍ كما عطر الورود
كانت صدور البشر فيها براح
كان فيها الرضا مِسْك الكبُود
وطاعة الله عندهم رأس الفلاح
بعد يومٍ ميِّزه شغْلِ وْجُهود
كلٍّ يْرَفِّه حسب ما هو متاح
كانت ألعابٍ بسيطه في حدود
مِتْعَةٍ شق القنا وعْظيم لاح
ولِعْبة الكيرم لها عشقِ وْوُجود
واللعب بالضُّومَنَه يضفي انشراح
وغيرها أَلعابِ لِلألفه تزود
ما اخرِجَتْ عن ذوق أو أمرٍ مباح
ناصر جمعان آل عوض -
وادي الدواسر
لعبه قديمه ولا تحتار
يا ضومنه وين ايامك
ما فيه عقده ولا اسرار
يا سالي فالزمن دامك
مرتاح دايم مع الابرار
وانظر تذكر متى عامك
ستة شبابٍ لهم تذكار
ودنيا تجدد على عامك
حمد عبدالله الوايلي - حوطة سدير
الضومنة صارت للاوقات مضياع
تجمعوا ربع للالعاب ضارين
من كثرة التفكير تزاد الاوجاع
اجسامهم تمرض ولاهم بدارين
الوقت لا يشرى ولاهوب ينباع
لا تتبع لناس عن الدرب غادين
علي الرشيد - رياض الخبراء
يا زين لعباتنا قدام
مافيه شاشه ولاجوال
مافيه واتس ولااستقرام
ولا تويتر كثير اقوال
ومافيه سوني يجيب الغام
ولاحوت ينهي حياة عيال
ماغير كيرم ولعب اكرام
اما نفود او جهات الجال
كانت بسيطه وحلو ايام
الناس فيها بليا اشغال
عبدالكريم النغيمشي - لوذة
نرحب بمشاركاتكم الشعرية
وما تلتقطه عدساتكم
من الصور الهادفة والطريفة
على إيميل الخزامى:
rb-khozama@alriyadh.com
صورة العدد السابق
Your browser does not support the video tag.