ويل قلبي من الهجران يا ويله

يا عرب خبروني وش هي الحيله
ما بقى دمعةٍ بالعين ما هلت
استوى صبحي المحزون معْ ليله
فِ الضحى وأحسب إن الشمس ماطلت
موقف الترف مني صعب تحليله
غاب عني ولا له جِرِّةٍ دلت
ما تعذر ولا جتني مراسيله
مادَرَى بْروح خلٍّ بعده انسلت
انسحب صاحبي من دنْيتي غيله
صابنا في هوانا عين ما صلت
حلم عمري تهَدّم من معاويله
آه يا عهودِ ودٍّ غصبٍ انحلّت
ويل قلبي من الهجران يا ويله
صدمة البعد ما بَقّت ولا خلّت
الحزن وافِيٍ لِي مانقص كيله
والسعاده بعد فرقاه لي ولت
صب لي الهم قهوه من معاميله
والمشاعر حسب ما يشتهي ذلت
مشتري خاطره وأَهْنا بِتَدْليله
لهفة الشوق لأقبل سيّدي هلت
كنّه الطفل لخطا قلت يا حْلِيله
دامحٍ له ذنوبه زادت أو قلّت
كم مشى بي حنيني في مداهيله
ما أخطت الرجل بدروبه ولا ضلت
كل شبرٍ سعاه أسعد بتقبيله
عادتي من رحيل الزين ما أختلّت
أستعيد الزّمن دِقه وتفصيله
وآتذكر سنينٍ بالصّفا زلت
شاقني حلو همسه في تعاليله
وموج شعره إذا خصلاته انفلت
آتعمد يعيد الهرج ويْطيله
لا حضر كلِّ نسمات البِشِر حلّت
ياوجودي على طَرْفِه وتسْبِيلِه
وشامةٍ في شروق الخد له حلّت
له جمال شبكني في محابيله
له معزه سرت فِ القلب واحتلت
آية الحسن مَيّزته على جيله
جل من قدرته في صنعته جلت
آتحرى سحاب الوصل وأخيله
لو يطول المَحَل رجواي ما ملت
ناصر بن جمعان آل عوض - وادي الدواسر
Your browser does not support the video tag.