ياقبلة المسلمين ومهد شرع الإله

ياقبلة المسلمين ومهد شرع الاله
يادولتن عزها الله واعتلا شانها
الله وهبها وميزها بعزه وجاه
يرجح بكل الامم بالعدل ميزنها
يحميك ربي ودونك نكتب أغلى وصاه
من دون حدك يدينا تنقل اكفانها
من حاول يلد عينه فيك حنا عماه
بمقاتلاتن عذابه تحت جنحانها
تدكه وغيره اليا شاف قصر خطاه
نقضي على الشجره اللي تؤذي اغصانها
في عاصفة حزم الامه شر كل الطغاة
عقوبتن مرسله للفرس واعوانها
والحوثي اللي دعمه ايران نكسر شباه
في ساعة الحرب قبره وسط ميدانها
بقيادة اخوان نوره الكرام الدهاه
كل العرب في حمى الدوله وسلمانها
النادر اللي طلوعه يلفت الانتباه
اللي دعس فوق عقربها وديبانها
هو الرجاء بعد ربي الأمل والنجاه
الكل من عضته بقعا بنيبانها
عاشت بلادي وعاش الحاكم اللي بناه
يرفع مقام العرب ويجمل أوطانها
حنا فدا للسعوديه بكل اتجاه
تشهد لنا حبة البندق ونيشانها
لها الولاء في فقر لها الولاء في غناه
في ساعة الصفر ناقف دون حدانها
ولا غرابه ولا الشبان طول الحياه
متوارثين الولاء من روس شيبانها
اللي على المصمك انحو والزعيم اعتلاه
وصدح بصوت الشريعه فوق بنيانها
حطو نواة الفخر ياطيبها من نواه
في دولتن عزها الله واعتلا شانها
عبدالله بن حصين