جنود لو مالبسنا بدلة العسكر ومن يفشي أسرارنا خاين لدولتنا

بيت وصدى

كان بيت الاسبوع الماضي لمعد الزاوية عادي بن رمال الشمري حول الحرص على عدم افشاء اي سر من اسرار الدولة او تصوير مقاطع عسكرية توضح اي تكتيك عسكري او قوة عسكرية والبيت يقول:
جنود لو مالبسنا بدلة العسكر
ومن يفشي اسرارنا خاين لدولتنا
وقد كان صدى البيت من الشعراء
أسرارنا يالوطن مطلوب ما تذكر
الدار هي دارنا وللخير عزتنا
والخاين اليوم ترا هو يومه الأقشر
إن كان هذي سلومه فالعفو نضطر
ننهي حياته بإذن الله ما نتنى
أنتم رجال الوطن والسر ما يظهر
هذا أمانة وأنتم فخر أمانتنا
محمد عبدالعزيز الخنيفر/أشيقر
ترى الهدف عندنا نغير المنكر
شريعة الدين بالجيران وصتنا
والسر محفوظ لا يعلن ولا يذكر
حتى نخطط متى نصيد صيدتنا
ترى المواطن مع القوات له مصدر
يلاحظ المشتبه في وسط ساحتنا
مابه تهاون مع اللي دوم يستهتر
هذاك والله ما يسكن بحارتنا
علي رشيد الرشيد- رياض الخبراء
من دولة العز كلن هلل وكبر
لبى جهاد يدافع عن شريعتنا
يابن الحوثي طريقك يمنا مسكر
مالك علينا مداخل صوب ديرتنا
محدٍ طمع في حدنا ياحوثي يذكر
يعوّد ذليل ما يجتاز هيبتنا
سعود عبدالعزيز الهزاع - نعام
ياعادي الشمري السر ماينشر
نحافظ على أسرارنا من شان راحتنا
ياكثر ناسن لحفظ السرما تقدر
هذي تراها بعد مهيب عادتنا
الى غلط ويتعذرة قلت مايعذر
كم غلطتن قدمضت فاتت وضرتنا
السر مكتوب فوقه خطه الأحمر
ماننشر الشايعه لانشرت وجتنا
سعد صنهات السهلي
حنا جنود الوطن وان جونا عكر
نموت ما نخون ديرتنا وقادتنا
نحمي وطنا ولله نسجد ونشكر
ومن يقرب حدودنا بيشوف شدتنا
السر خافي وفي صندوق ومسكر
ونحفظ وطنا بعزتنا وكرامتنا
ياللي تبي الشر معنا بنصحك فكر
الله لا يوريك يا بن الناس قوتنا
سلطان سعد السهلي - المجمعة
ترا الوطن هو أمانة كان ما تشعر
هو عزنا هو فخرنا هو سعادتنا
واللي اعتدى ضايع والرجل له تقصر
هذا وطنا دوام فوق رايتنا
السر مطلب وكلن دايمن يستر
وإخفاء الأسرار مطلوب وغايتنا
الدار دراك وفيها لازم تفخر
محلها بالقلوب هي حبيبتنا
ريان محمد الخنيفر/أشيقر
وعلى اوزان وقوافي اخرى
صون الوطن ماهو بحكرعلى العسكر
واجب علينا حتى لو ما تعسكرنا
أمن الوطن في عرفنا خط احمر
يدٍ بيد شعا رنا يوم وحدتنا
من يظلم الأوطان خائن ومنكر
ومن غشنا في أمننا ليس منا
أقبح أناسٍ في رأي اهل الحكم والدر
مفشين سر الوطن في يوم هجمتنا
عبداللطيف الحُمَيَّانِي / عنيزة
بيت الاسبوع
يكتبه الشاعر صالح البشري من الرياض حول الواجب الوطني تجاه الله ثم الملك والوطن ويقول:
حرب ضروس مالها غير سلمان
أمرك ياعاهل مملكتنا ولك سم
نستقبل صدى هذا البيت بأربعة أبيات
ويفضل الإرسال عبر الإيميل:
rb-khozama@alriyadh.com
أو على الفاكس 4871070/ 011
كما يسرنا مشاركة القراء بموضوع البيت ونرحب بطرح بيت الأسبوع من الشعراء حول اي موضوع.