رباعيات رمضانية

رمضان وتربية النفس
شهر الصيام يربي النفس يااخوان
على العبادة والفضايل والأخلاق
منهل به الخيرات من كل الأفنان
وين الذي لجنة الخلد مشتاق ؟
يعمل ويلقي الطيب من عالي الشان
نعيم بالدنيا ويوم التلاقي
سعادة ومافيه مثله للإنسان
المخلص لربه بليا نفاقي
رمضان شهر التوبة
ابنصحك دامك بشهر الحساني
ياباغي الجنة ومعه الزياده
التوبة التوبة ترى العمر فاني
ترى مردك للفنا والإباده
اعبد لربك واخلص بكل شاني
وحافظ على شهرك بكثر العباده
لاتلتفت للناس قاصي وداني
أهل الحسد والفسق وأهل القراده
القرآن شفاء لما في الصدور
ياضايق صدره ومحزون بالحيل
أبرشدك لعلاج فيه السعاده
إقرأ كتاب الرب بالصبح والليل
وطبق كلامه دون نقص وزياده
تعيش مبسوط ودربك تساهيل
ويوم الحشر نفسك لعدن مقاده
إقرأ وخل العين دمعه هماليل
واخشع ترى الخشوع للقلب زاده
الدعاء وتحري وقت الإجابة
تضرعوا للرب في وقت الأسحار
ووقت الفطور وكل ساعة إجابه
ترى الدعا هو العبادة يالاخيار
هذا الحديث اللي محمد حكابه
ترى الدعا سلاح فاعل وبتار
للمخلص اللي كل خير سعابه
والرب مايخيب رجا عابد بار
ادعو ترى المعبود مفتوح بابه
الصلاة نور وبرهان للعبد
نصيحة ماهي تقدر بالاثمان
أقدمه لك ياعزيزي بحياتك
صل الفريضة واطلب الرب غفران
وبالنافلة كمل نواقص صلاتك
تكسب رضا رب كريم ومنان
وترتاح بالدنيا ولحظه وفاتك
تراه نور لك صلاتك وبرهان
حافظ عليها كان تبغا نجاتك
صالح بن عبدالله الزرير التميمي