بيت وصدى

كان بيت الأسبوع الماضي للشاعر عثمان ابراهيم الرشيد من الرياض حول اخطار السيول ومدى ما يصاحبها من عدم اكتراث وتهور صبياني وعدم مبالاة بخطورته ويقول:
احذر من الاخطار واحذر من السيل
كم واحدٍ وداه درب المنية»
وكان صدى البيت من الشعراء:
ترى التهور يحدث الشر والميل
كم من شباب روحوا به ضحيه
السيل لا جانا يهل الهماميل
خلك نبيه والتزم بالوصية
جنب عن الجاهل وقول المهابيل
ما حد يفيدك لا خسرت القضية
واحرص على الحيطة وخل التهاويل
اجعل مسارك في دروب سويه
علي رشيد الرشيد - رياض الخبراء
كم واحدٍ كَبَّر عليه المصلين
سِبَّة عناده ذاق طعم المنيه
السيل رحمه مِرْسِله منزل التين
يجعل به الأرض المحيله رويَّه
كم ناس في دربه جُلوس ومقيمين
روَّح بهم عاتيه من غير جيَّه
حكمه وقيلت قد لها سنين وسنين
السيل حربٍ للجبال العليه
ناصر بن جمعان آل عوض - وادي الدواسر
السيل لا جا فافرحوا يا رجاجيل
وافهم دروبك بين روجة وجية
والسيل مخطر كم فيه التهاويل
والسير وسط السيل أكبر خطية
إلزم مكانك لا تجيك الغرابيل
وابعد عن الوديان هذي وصية
ريان محمد الخنيفر - اشيقر
لا جا الوبل ثم هل وزداد في الكيل
تواست الريضان سيل مليه
وقامت تدوج الناس لو كان بالليل
يالله على الشعبان قصد ونيه
والجو يغري في مناظره بالحيل
بس الخطر حولك يجيب المنيه
احد رمى نفسه على وادي الويل
واهله على فرقاه مره شقيه
حمد عبدالله الوايلي - حوطة سدير
اتبع طريق الحق وابعد عن الميل
الصدق ساسك والنوايا مطيه
واحذر دوربك واحذر الدرب بالليل
عام لجميع الناس في حسن نيه
وقت المطر خطر ومعروف بالحيل
واللي تهور راح بالمهمهيه
عبد المحسن المحيسن - رياض الخبراء
اضرب حسابك للحفر والدراكيل
وابعد عن سيول قفتها بردية
محد يناطح سيل الا المهابيل
يغرق جيوش كاملة مع سرية
خص المراهق ومن بسنه من الجيل
يعطى تعاليمٍ قبل الاذية
سعود بن عبدالعزيز الهزاع - نعام
لا شع نجم سهيل ياوافي القيل
جنب عن الوديان صبح وعشيه
ترى الخطر بالعين ينشاف بالحيل
والسيل ماحدن يرتمي في مجيه
حذراك تمسي من عداد المقاتيل
نصيحة من كل قلبي هديه
على الزولاني الفيفي - بيشه
السيل فيه أفراح وخير وتهاليل
والسيل يفرحنا ساعة مجية
ولا جاء السفر يلزم عليك التفاصيل
وافهم دروب تجهله أو خفية
وسيرك نهار والحذر سيرك بليل
هذي نصيحة للي عزيز عليه
محمد عبدالعزيز الخنيفر - اشيقر
بيت الاسبوع
يكتبه اليوم الشاعر فهد الطويان من بريده حول التعصب الرياضي المنبوذ ويقول:
صارت رياضتنا تعصب حزازات
مانت بمعي تراك صفيت ضدي