قبل الورق

بصمة:

يا هاجسي كل ما دورتك ألقاك
ف.. البال قبل الورق قبل الكتابه
يرقاك همي وبعض أحيان يرقاك
مترف شبابه ويزرع بك سحابه
المايس اللي يجيب أقصاك ل.. أدناك
ياما تطويت في حضرة جنابه
هذاك له باب في قلبي وشباك
وأعشاش وطيور وأسوار ورحابه
وأبراج وأعلى من الأبراج وأفلاك
ومرهف أحاسيس وأشواق وصبابه
وصالة أنفاس وأنفاسه كما الراك
وفراقه أحزان وأحزانه كآبه
ياما كتبتك على شانه ويقراك
فاضي ومليان واجواد وعصابه
هذا قدرنا نبوح وبوحنا ذاك
ما كان له بير في صدرٍ لجابه
لو كانت الصدر بير أظماك وأظماك
وأروى من الصمت وأنهل من شرابه
بس العزا فيك تكفيني سواياك
ويكفيك تلبسني بشوت ومهابه
في نوتة الجهل نكتب بعض الأدراك
ونضبط بعض شيء في قوس الربابه
ويصير للصوت معنى غير الأرباك
صوت يجي غير في وقت التشابه