على فراق حمودد

قصيدة رثاء في الشيخ حمود بن صخيل شيخ قبيلة المطارفة رحمه الله
سبحان من له قدرة فاقت على كل اعتماد
يقدر ولا يقدر على خلقه سواه بكل حين
جلّ وتعالى فيه نؤمن للأبد رب العباد
وبقدرته نرضى ولا مره مخلصين وطايعين
أمانتك يا رب تاخذها ولا عنها حياد
أمرك مطاع بكل ما تامر وخلقك خاضعين
أنت الكريم اللي تعلا من على السبع الشداد
وانت العظيم وبك على ظيم الليالي نستعين
تعيننا بالصبر والسلوان يا خير السناد
وتلايم جروحٍ بدت تنشاف والجرح الدفين
على فراق حمود اخو سربه سند وقت الظهاد
شيخٍ بفعله في زمانٍ شين يستر الحزين
شيخ القبيلة عزها وسنادها علمٍ وكاد
عند اللزوم تبيّن افعاله مثل حد السنين
فرز الوغى فعله برز يوم الشدايد واستفاد
منه الضعيف من قبيلة لين شده باليدين
رمزٍ تفاخر به بني وايل ليا اشتد العناد
مقدم هل العشوي ليا صعبت له القالة تلين
شيخ الكرم والجود والفزعات والراي السداد
بجاهه يحل المعضلات الكايده ما يستهين
بالدين والعفة تميز والسخا والجود ساد
نفس زكية تطلب الطولات في دنيا ودين
أعدل من السيف المهند ما يحيد ولا يحاد
واطهر من الغشنه من مزونٍ تسر الناظرين
زيزومنا الصيروم لو نعلن على غيابه حداد
والحزن في كل القبيلة والرجال موجعين
الله يقوينا بعد فرقاه في صبر وجلاد
ويعوّضه بالجنه الخضراء إله العالمين