صوت الوله

على ذكرى الجروح اللي تسمى بالزمان جروح
نشيب ولا تطيب ولا لها سلوان معداوي
حبيبي والزمان اللي يعذبنا بلا مصلوح
تساهلت الصعيب وكشرت دنياك للهاوي
حبيبي والزمان اللي جعل صوت الوله مبحوح
انا والياس بدروب طويلة ليلها ضاوي
مجاريح الزمان اللي هقايها سراب يفوح
على صحرى السنين اللي تنزح ذيبها العاوي
قريت اقصى حدود الليل والمسرى بروق تلوح
تجهمت الطريق وملتقى الدربين متساوي
توهمت المسافة والهقاوي بابها مفتوح
تباطيت الصباح وجيت لك في شيمة فداوي
على صدر السنين الماضية واللي تجي وتروح
تموت أحلامنا ياللي ترد الشود وتراوي
على موت الظنون اللي تناشد دمعها مسفوح
صفا ذهن الهجوس ولا لفا بك هاجس غاوي
حبيبي ما هقيت ان الليالي بالظنون تبوح
بسيطة واعتبرني في زمانك ضيف ومخاوي
مثل ما للجبل هيبه وله قمه وظل سفوح
هوانا ما تطوله كلمة الحسد والراوي