نجدد عهدنا الماضي من أقصى القلب وأعماقه

سلام الله على اللي رايته بالعز خفاقه
أبو متعب زعيم العرب والبيتين حاميها
وسلام الله سلام عد نوٍ لاح براقه
وعدد ما هل هماله على البيدا ويرويها
سلامٍ صافيٍ يشدي شعاع الصبح واشراقه
يقوله من ملوكه بالقسا واللين يفديها
رسمت ألك البيوت من الذهب وأهديتها باقه
على حضرة مقامك يا زعيم العرب مهديها
تسابق يمك ابيوت الشعر وتجيك منساقه
وحروف الشعر تعجز عن خصالك لا توفيها
يسير المركب اللي تحته الأمواج صفاقه
بمان الله يسير وثم بمان الليث مرسيها
شعاره فوق بابه ما يهاب الموت سواقه
على بر وبحر يجرى وبسم الله مجريها
بنى سور الوطن عبدالعزيز وزانت ارواقه
ورفت راية التوحيد في عالي مبانيها
بعد حد كيانه مال عدوان الوطن طاقه
يدوس اعداه باقدامه وكاس المر يسقيها
يتل الخصم اخو نوره على خشمه ويستاقه
ودستوره كتاب الله وكل الناس مرضيها
عساه اليوم في جنه إله الكون وارزاقه
يعيش بجنة الفردوس في عالي مراقيها
وابو متعب على نهجه بجل الوقت ودقاقه
عيون الشعب تكحلها وعيون اعداك تعميها
عشقت الموت من دون الوطن يا سيدي عشاقه
وتشهد لك جميع الناس قاصيها ودانيها
حميت المملكة بمصقلات حدب ورقاقه
تخضبها بدم اعداك روس اعداك تفنيها
جعلت المملكة بين الدول يا شيخ عملاقه
عقب ما هي بصحرا قاحلة ما احدٍ يواليها
نشوف المملكة بين الدول بالخير سباقه
تعين وتنصر المظلوم ويخسر من يعاديها
شمل كل الوطن خيرك وعم الخير بأسواقه
مراسيم الزياده يا عسى ربي يحييها
حميت الشعب وأكرمته وزال الفقر والفاقه
وتحقق للوطن والشعب منك أغلى أمانيها
ولك من شعبك المخلص دعاه وصادق اشواقه
جميع الشعب يرددها ويعلنها ويدعيها
وابو خالد ولي العهد عجز البوك واوراقه
عن فعولٍ تنومس كل كاتبها وقاريها
بذل جهده ولا يحسب لجور الوقت وارهاقه
ليا شبت جحيم الحرب ابو خالد يطفيها
يمين الخير من سلطان ابا الخيرات دفاقه
جميع الناس يرضيها وجميع الناس يعطيها
ويعيش القرم ابو خالد ومعه اخوانه ارفاقه
حرارٍ في الليال العوج ما تقصر يمانيها
وحنا جنودكم دون الوطن للموت مشتاقه
على روس العدا وندوس عقربها وافاعيها
ونجدد عهدنا الماضي من اقصى القلب واعماقه
ونثبت لك ولانا، دارنا بالدم نشريها
ولا نخدع بمن هم للوطن والعهد بواقه
ولا نسمع هذر بعض القنوات ومذيعيها
نعرف الكذب من وجه الكذوب ونعرف اخلاقه
ولو شفر حروف مبهمه نترجم معانيها
يدس السم في جوف العسل ويقدم أطباقه
ولا يقدر ضعيف النفس حيلاته يمشيها
يزيد الهم في قلب الحسود ويونس احراقه
وعلى كبده لهيب النار تحرقها وتشويها
لزوم أن العدو يقتل وتعلن ساعة فراقه
وتموت الحيه اللي سمها من بين اذانيها
ومن الشعب السعودي من عبير الورد واعباقه
تحيه للملوك اللي نقدرها ونغليها
وصلّى الله على محمد نبيٍ ما حدٍ عاقه
شفيع الناس فالمحشر من أولها وتاليها