مرحوم يا ريف الضعوف المساكين

علم لفانا في ضحى يوم الاثنين
يحمل معه معنى الالم والفجيعه
ينعي لنا فهد العرب ناصر الدين
درع الوطن حصن الحصون المنيعه
فهد حليف المجد سقم المعادين
تعرف فعوله في نهار الوقيعه
مرحوم يا متعب بعدك السلاطين
مرحوم يا غيث البلاد وربيعه
مرحوم يا ريف الضعوف المساكين
يا ذخر من ذاق العنا والهزيعه
مرحوم ياماسح دموع اليتيمين
يا عز من يشكي الجفا والقطيعه
يوم الكويت اجتاحها راعي الشين
راعي الخيانه والغدر والخديعه
وقفت ميقاف القروم الشجيعين
وراية كويت العز عادت رفيعه
يكفيك فخر انك خدمت الحرمين
بكل شي يا الفهد تستطيعه
ويكفيك فخر مجمع يخدم الدين
يطبع كتاب الله طبعه بديعه
حميت دارك من شرور الحقودين
ودرب الخطر يالفهد سديت ريعه
من بحر جده لين تاصل لدارين
ومن حد عرعر لين حد الوديعه
حصنتها من كيد الاشرار تحصين
برجالك اللي فالمعارك شجيعه
تبكيك يا فهد العروبة فلسطين
ياما بذلت لها المعونة سريعه
تعطي ولا تحسب حساب الحسودين
مدك بحر ماهو سراب بقيعه
ويبكيك شعب بكل الأحوال وافين
شعب جعل طبع الوفا له طبيعه
وحنا على فقدك ترانا حزينين
ومن حزننا ضاقت علينا الوسيعه
لكن عزانا فيك طلق الحجاجين
عبدالله اللي كلبونا نطيعه
له الولا.. وله العهد.. والعهد دين
وله بيعةٍ تعطى بحكم الشريعه
وياالله يا رب الصيام المصلين
يا خالقٍ عبدك وتعلم صنيعه
تغفر لبو فيصل حبيب الملايين
وتجعل رسولك يا إلهي شفيعه
ولا عدت يا علمٍ لفا يوم الاثنين
علمٍ حمَل معه الألم والفجيعه