فقيدة العالم

عظم المصاب وضاق صدر العناوين
كلا فقد له غالي في نهاره
وغطا الحزن حتى قلوب البعيدين
يوم الخبر عم الفضا بانتشاره
يحق لك يا المملكة لو تعانين
يحق لك تبكين سر وجهاره
يحق لك بعد الفهد ما تنامين
من هو يساوي فهدنا في وقاره
الله يعوضنا (بيمينه) وتلقين
فيه السعاده عقب هذي المراره
ويحسن عزانا في حبيب الملايين
يا الله عساها جنة الخلد داره
ويا جعل قبره روضةٍ ترضي العين
مثل الرضا اللي منطبع في مساره
في كل ديره له حضور وميادين
نهجه (كتاب الله) و(حبه) شعاره
روحه وفيه سيدي عاش للدين
مخلص وموته كان روح الخساره
تشهد على بره زوايا الحرمين
عسى الحبيب المصطفى يكون جاره
ما مات ذكره لو دفن جسمه الطين
بقلوبنا عايش ومجده مناره
رجواك يا ربي جنان وبساتين
ترضي بها من عاهدك بختباره
ويا الله ندعي له صيام ومصلين
اقبل دعانا جنة الخلد داره
وجل المصاب وضاق صدر العناوين
كلا فقد له غالين في نهاره
مشاعل العسيري
علم سمعته كدر القلب والعين
خلى دموعي فوق خدي هميله
فالتاسعه والنصف من صبح الاثنين
نزل على قلبي نزول الثقيله
علم يكسر صم الاحجار نصفين
خلى فؤادي فوق جمر المليله
خبر وفاة الفهد نسل الميامين
فهد العرب راع الفعول الجليله
عساه للجنة زعيم السلاطين
شيخ رقى بالطيب راس الطويله
هو قائد الامة وهو ناصر الدين
تذكر فعوله كل دار وقبيله
عنه اسالوا الشيشان وايضا فلسطين
واهل الكويت وكل من مات حيله
كرم يمينه عم الاقصى والادنين
ومن ضامته دنياه لازم يجيله
يا كثر مداته على العسر واللين
مروي الكبود الناشفات المحيله
وعن مكة وطيبه تكفي العناوين
يا عظم فعله والشواهد دليله
فقيدة العالم من الغرب للصين
زعيم ما شفنا زعيم مثيله
يا رب يا قابل صلاة المصلين
يا واحد ما خاب من يشتكيله
يا رب يا منزل تبارك وياسين
انت الملاذ لمن ظروفه مهيله
ادمح خطاه وبدل الشين بالزين
وانزل على قبره حقوق المخيله
عساه بالجنة برفق النبيين
ويا جعل روحه بالجنان الظليله
عساه بالجنه معي قولوا آمين
وتحسن عزا كل النفوس العليله
عز الله إنا من فراقه محازين
حزن جبال طويق تعجز تشيله
إذرف دموع العين يا محجر العين
وابك الفهد وابكه سنين طويله
بنبكي فهدنا سنين وسنين وسنين
ونرثيه بحروف القوافي الجزيله
وحنا على عهد قطعناه ماضين
وعسى العوض في كاسبين النفيله
عبدالله وسلطان عوق المعادين
يحفظهم الله كل يوم وليله