العلم الصحيح

جيتني تحمل عتابك أو كذا تحب التغلّي
من هو فينا يا حبيبي صار للثاني!!! جريح؟
الصحيح إني أحبك وان لمحتك جيت كلّي
خل حكي الغير عنك وأقضب العلم الصحيح
عاذلي خله يولي،، جعل خطواته تولّي
لا تهزك يا حبيبي في دروب الحب ريح
الحلول إن عاندتني فالصراحة دوم حلّي
في عهود الحب واضح،، خذني (القلب الصريح)
وكان ظنك في غرامي منبعه حب التسلّي
ليتك تشوف المعذب كيف من حبك طريح
أدري إني في خفوقك وأنت تدري صرت خلّي
هو قصيدي ما فهمته أو!!!! أجيبه بالفصيح
أنت من أهداني الشعر البديع مع التحلّي
انت شوق، أنت ذوق، أنت ملح يا مليح
أنت (عزي) يا عزيزي وأنت أحد أسباب ( ذلّي)
وانت (ضيق النفس) فيني وانت هالكون الفسيح
أنت (شمسي) وأنت (بدري) وانت ظلك صار ظلّي
وانت أعنف (ذم) جاني وانت لي فوق المديح
أنت روحي كل روحي يارياحيني وفلّي
وأنت وجه الكون كله، دونك العالم قبيح
اطلب اللي تشتهيه ولا يجي ذكر التخلّي
شفت كوني دون شوفك صار في حبه ضحيح
لو تبيني أقعد محلي ما تعدى من محلّي
لو تبيني اصيح باسمك يا الغلا والله لأصيح
لو أعد وصوف حسنك ويش أعد؟ وويش أخلّي؟!!
والله إني قبل أعرفك كان بالي مستريح
بس أمانه يا حبيبي لا (عناد) ولا (تغلّي)
دامني (قلبٍ جريح) يموت (في) قلبٍ جريح