راعي النميمه

اللي يجيب الهرج واللي يوديه
ماهو جليس لي ولاني جليسه
فيه طبيعه يا جماعه مادانيه
راع النميمه والطباع الخسيسه
والله يمين اني لا روح واخليه
ماني مجالس من يطاوع بليسه
البعد راحة بال واخير مافيه
فرقاي مجلاس الوجيه النحيسه
ان كان مال الرجل عقلٍ يقديه
يصبح لعميان البصاير فريسه
والصمت حكمه يكسب الخير راعيه
والرجل هرجه واجب انه يقيسه
وسره يحفظه لا يبيح بخافيه
يخل السراير بالضماير حبيسه
وبالمعرفه يسعى وتفلح مساعيه
ولا يكسب الا الطيبه والنفيسه
والا الجهل ربي يكافي بلاويه
هدم رفيعات البيوت المسيسه
كم جاهلٍ روابع الجهل تغويه
امن الجهل عايش معيشه تعيسه
ما يدري ان العمر تفنى لياليه
وكلٍ يبي يجني حصايل غريسه