دمعي جرى

هذه قصيدة رثاء في الوالدة رحمها الله التي انتقلت إلى رحمة الله يوم الخميس 4-4-1426ه
اختارها رب العباد وخطفها
عن ناظري ما بين يومٍ وليلة
بكيتها وأبكيت من لا عرفها
وأصبحت من بعد المفارق عليلة
سرنا بها بعد المرض ما حذفها
نركض ندور والدواء مستحيلة
لكن مقدور الأجل انتقصها
مالي على المقدور قوة وحيلة
عجزت نسيان الحلا مع وصفها
أشوفها وأتذكر أمٍ جليلة
كلمة هلا يا مرحبا من شففها
للي يجي وللي يغادر ظليلة
كلٍ تعلق بالجميل وقطفها
وكل على الإحسان برهن دليله
دمعي جرى والحزن سيل جرفها
جمرٍ حرق رق الخدود وشليله
واكسر قلبي بعد ربي صرفها
واضيعتي بعد الحنان ورحيله
من بعد ماني والعيال بكنفها
اليوم من لي غيرها من بديله
يوم أتقوى من تقوى طرفها
وتعينني وأعينها بالوسيلة
من اجتهد في برها ما نصفها
وأنا بعد ما أعطيتها إلا قليلة
ننظر لها وقت الصلاة ونصفها
ترفع كفوفٍ للولي ترتجيله
جاها التقى من زهدها والتحفها
صانت جوارحها عن أدنى رذيله
عن زينة الدنيا جنح من عطفها
تحصد لدار تنتظرها نزيله
من عام الأول والموادع حففها
تسرد علي أحلام عين كحيله
ياما اشتكت لي من قلايل ضعفها
من خوف الأسرة لا تظلي هزيله
وأنا بغبايه ما عرفت بهدفها
هدّيتها ولا طفت روحٍ جميلة
واليوم من لام العيون وذرفها
ما حس ما حس الفؤاد وقتيله
يا رب أجرني فالمصيبة وخلفها
أغلى الحبايب يا إلهي دخيله
أحسن منازلها وعطها صحفها
بيمينها يا خير منتا كفيله
يالله أرأف بالعيون وخوفها
في جنة الفردوس تطلق سبيله
وأجبر على قلبٍ همومه عزفها
وإن انتهت أجمع لقائي بمقيلة