تحية للفهد

يطيب القاف في مدح الرجال اللي لهم ميقاف
رجالٍ لأجل دين الله ومن شان الوطن تافي
رجال ما تهاب الموت فعلٍ بالعيون يشاف
وكل ثابتٍ صامد على الرجلين وقافي
تناخوا واعتزوا بالله وخاب الخاين البلاف
على العدوان شبت نار من قواتٍ اصنافي
ولا أدري كيف أببدأ كيف أعبر كيف أصوغ القاف
حدث هزَّ المشاعر ما يكف الشرح في قافي
طغى من لا يقدر ما يعرف الحق والانصاف
شرار الناس تسعى للبلد بافساد واتلافي
تنكر مشعل الفتنه خساسٍ والعقول خفاف
وش الداعي وش اللي ثوره ممهون الاجدافي
يحسب الدار لعبه مادرى عن ماضي الاسلاف
جنود تقهر الباغي بضرب رماح واسيافي
خذوها قوةٍ يوم الحرايب والسنين عجاف
وكم من راس شيخٍ قصّته من فوق الاكتافي
هل العوجاء ومن يزبن هل العوجاء أمن ما خاف
ولا ينكر ثناهم كود هيسٍ ساقط هافي
ترى عبدالعزيز اللي على البيدا بسيفه طاف
يحد الخيل وسط المعركه والسيف قصافي
طلع من دار أخو مريم معيفٍ بالعمر جزاف
على عوص النجايب بالفيافي يهرف اهرافي
معه له سربةٍ للموت تقدم ما تعرف إنكاف
وكل للمعادي بالملاقاء سمٍ زعافي
سرى في ليلة ظلما ولا حسب يجيه اخلاف
معزّم مستعين بالولي ويحقق اهدافي
سطا بالدار يبي الملك ملكٍ ما عنه محراف
يموت ولا يشوف اللي عليها حازوا نحافي
نصره اللي يكون أمره ما بين النون هي والكاف
ولي الكون ما يخفى على رب الملا خافي
أبو تركي له المعروف ذاك الصارم العراف
تجود به ايلين إنه شرب من ميّه الصافي
شرب واسقى شعوبٍ في زمانه ظاميه واضعاف
الى ذا الحين ثواب العز من فوق البلد ضافي
ومن عقب الزعيم الصيرمي قاده حرارٍ تاف
على نهجه مشوا والشرع حدٍ بين الاطرافي
زهت بسعود ثم الفيصلي كل بشعبه راف
قويين العزوم وبالمواقف حيد واحصافي
ومن بعده حكمها اللي بحكمه تضرب الاوصاف
لخالد زانت الدنيا وعهده ماله أوصافي
واباثنّي على راع الجمايل ما بعدّه حساف
فهد زاك العهد هو درعها هو فيّها الدافي
أبو فيصل تحزم يوم شاف اللي عليها حاف
حماها يوم خان اللي جزا المعروف بخلافي
حماها واحتمى اللي جاه فزاعٍ يبا يستاف
لك الله ما اهتني بالنوم لين الشيخ يستافي
تقعّد للخصيم اللي طمع بالجار لينه عاف
وخلى الدار لهل الدار واللي صار له كافي
إلا يا ويل من خان البلد يسفي عليه الساف
إبقواتٍ تسرك للمعادي ترجف ارجافي
تحية للفهد واللي على يمنى الفهد وقاف
ولي العهد عبدالله لنا مسناد والحافي
وابو خالد نوده مخلصين والقلوب انظاف
هذا سلطان ساس الخير مثل الغيث هتافي
لهم مجد ولهم تاريخ مثبوتٍ ولا هو خاف
صقور من صقورٍ تعتلي في راس مشرافي
فهد بن عبدالعزيز الرميان/ إمارة منطقة القصيم