المملكة في ظل أبو فيصل عمار

يا شلة التخريب وأنواع الدمار
تحريفكم للدين والله ما يصيب
اخترتوا الدرب العوج واصعب خيار
اشعلتوا الفتنة على الشعب الحبيب
والمملكة يشفع لها نور النهار
وانتم خفافيش الظلام اللي تخيب
مستعبدين ورايكم عكس المسار
تفجيركم مبني على حظك نصيب
وين الهدف؟ والا على نهج القرار؟
صار المواطن عندكم نفس الغريب
حتى الغريب اللي تذرى واستجار
كلٍ على الفتنة غدى ضده حريب
جاكم بامان ولا يفكر بالحصار
واليوم اشوفه صار برقبته طليب
الأجنبي في داركم عنده شعار
كن يا غريب إن طالت الغربه اديب
ما عشعش الشيطان في رأسه وصار
يمشي على نهج الدمار المستعيب
حط الكرامه في ضميره واستدار
وانتم قلبتوها غثاء والله رقيب
في وضعكم والدين ما يصلح ستار
منهو تستر به عسى ما يستثيب
في روسكم تخطيط.. تنفيذ.. انفجار
والسيف للروس ونواياها طبيب
الله يعز اللي حكمها باقتدار
مثبت الرايه مع الوقت الصعيب
زيزومها حر تسلسل من حرار
يجرح وجرحه من مخاليبه عطيب
تنعم على عصره وصارت بازدهار
عقب الظمأ والشرب من كف القليب
طافت على قاموس (لحظة وانتظار)
لين أوصلت قاموس (ماشا الله عجيب)
اسمه يردد فوق مع كل انتصار
اكبر سياسي حق وأهدافه تصيب
فهد.. فهد.. حاكم ولا هو مستشار
خصمه يجيه ولا نكف يرجع صويب
والمملكة في ظل أبو فيصل عمار
دمر خفافيش الظلام اللي تخيب
حسبي عليكم يا حثاله واختصار
واحدكم اليا شيف قلنا له يهيب