صيف حايل لحاله

التميمي تهيّض وابتدى القيفان بسم الله الرحماني
الحليم الرحيم الواحد اللي كلنا في رجا غفرانه
وبعد ذا مرحباً ما داعبت عود الحبق نسمة مسياني
وعد ما غرد القمري على حدب الجريد وسجع بالحانه
جيت اغني بحايل واتغزل في هواها وابث اشجاني
يا شخانيب اجا ناجاك قلب انسان والترجمان لسانه
وقبلي القاضي محمد وابن لعبون وبديوي الوقداني
كل بديرته مفتون والشعار باوطانها هيمانه
فضفضي يا حروفي عن شعور الشاعر المغرم الولهاني
سفح اجا الليله معزب وانا والوزن والقافيه ضيفانه
همت في حب حايل مثل ما هام ب (هيا) محسن الهزاني
اتوب عن حب حايل؟ قلت: لا لا حبها راجح ميزانه
وصيف حايل لحاله صيف هايل صيف ما له ولا له ثاني
الله اللي وهبها الشاعريه والبها والحلا سبحانه
وجو حايل طبيعي والحراره حسب نشرة حسن كراني
طقس حايل بديع ومعتدل وانسامها بالندى ريانه
كل ما اقبلت يا حايل وشفتك شلت يالاح ياليحاني
ساحره فاتنه بين النفود وبين ضلعان اجا كالدانه
انتي ام الكرم نشهد ويشهد لك بعيد الملا والداني
وانتي ام الصخا وقت الشدايد والرخا من قديم ازمانه
وعد ما فاح ريح الشيح واليشموم والفل والريحاني
وما ارتكم وارتهش وارهش وجهي وابهل وهل وبل امزانه
ختمها يا صلاة الله على المختار ما غاب نجم وباني
النبيّ الأبيّ اليعربيّ الهاشمي من نسل عدنانه