مفترق الطرق

الطرق لا تاقف على مفترقها
اختر طريق وما على الباقي حسوف
ومن لا حذر بعض الدروب وزلقها
يوعي وساقه بين الالواح ملفوف
والخلق يكفل رزقها من خلقها
لو زانت ظروف ولو شانت ظروف
وبعض النفوس ولو يقصر وفقها
ماهيب ترقب من هل الخير معروف
عن ما ورا هالخلق عميا وصقها
وتعف من هون تحصل به شفوف
يوم ان شر الناس في مرتزقها
ناس على بيبان خلق الله وقوف
يهرج بعضهم قصة ما صدقها
وما بين هالكلمة والاخرى خذ حلوف
والحاجة اللي دائما يختلقها
مديون ولحاله يعول امة ضعوف
له جبهة ما قد تصيب عرقها
لو لابس بالقيظ ثوب من الصوف
صار التخضع ملة يعتنقها
ويسعى على مدات الاجواد ويطوف
سق همتك يا بارد العزم سقها
ان ما بحالك رفت محد بك يروف
وملذتك من زرع يمناك ذقها
في كل محصود وفي كل مقطوف
اللي خلقها عن سواها فرقها
تلقى عليها وصف ما مثله وصوف