اجمل سنيني

يامن غدا يروي بعد صكة الباب
اقفا ولا رد اعتبار لخفوقي
صد وتغاضا واتبع غياب بغياب
ما كنه اللي ساري في عروقي
ولا كنه اللي صار لي كل الاحباب
واجمل سنيني وانشغالي وذوقي
ولا كنه اللي مسهر جفن واهداب
لاجله سهرت الليل حتى الشروقي
ولا كنه اللي جارح قلب منصاب
كله هموم وزادها بالحروقي
ولا كنه اللي بالغلا قال لي ذاب
وانه على حبي حريص وصدوقي
كم كنت اناجي ليلتي بوح وعتاب
وكم كنت اسامر خاطر ما يروقي
ان قال وينه قلت موجود ما غاب
دايم على طاري غرامه شفوقي
من غيبته والجرح بالقلب ما طاب
اكتب قصايد في غيابه وشوقي
حتى غدا جرحي وشعري لي اصحاب
ان صاح جرحي ترجمت له طروقي
يامن رحل عني بلا ذنب واسباب
ارجع ولاني ناشدك عن حقوقي