تأنيب الضمير

يا رحيمٍ يا ودودٍ يا غفور
يا عليمٍ يا لطيفٍ يا خبير
يا عظيمٍ ما تضيم ولا تجوز
جل شانك يا مجير المستجير
من لجالك التجابك ما يبور
العسير يصير بامرك له يسير
وبعد هذا ما نلف ولا ندور
والدروب العوج معها ما نسير
من زمان أول وقيدوم العصور
والمراجل دربها دربٍ عسير
والزمن غدار والدنيا غرور
ولا يغر بزيفها غير الغرير
لو صفت مهما صفت ترها تبور
بالنكد لازم رحاها تستدير
انشد اللي من عناها والعثور
للقراده صار مندوب وسفير
ادبرت به من دبور في دبور
ومن سبايبها غدا حاله خطير
السعادة فارقتني والسرور
والغصون المبرصة صارت هشير
في ظلام دامس ما شفت نور
لين صار الحزن خلي والعشير
حظي اللي طاح عيّا لا يثور
كالضرير اللي وقع في قاع بير
وعن لذيذ النوم صايبني نفور
طول ليلي ساهرٍ كني خفير
لا ذكرت اللي مضى دمي يفور
اتحسر واجتلد وازفر زفير
الندامة صارت احساس وشعور
ولا ذبحني غير تأنيب الضمير
قلت أنا يا قلب جاهد لاتخور
واطلب اللي دايم بحالك بصير
اطلب الله بالغروب وبالسحور
واطلبه لا عسعس الليل الستير
الليالي تبتسم ثماً تجور
والمنايا غرة ترها تغير
والمناصب والمراكب والقصور
والضنا والمال وفراش الحرير
للزوال ومنتهانا بالقبور
درب واحد لا غني ولا فقير
يا عظيمٍ بامرك الكون معمور
نسألك من كل خير ونستخير
ما نرى في كل خلقك من فطور
جلّ خلقك والبصر يرجع حسير
أسألك غفران ذنبي يا غفور
والسلامة من لظى نار السعير
يو حشر الناس في يوم النشور
العسير اللي عبوسٍ قمطرير
وعد يومٍ زل وعداد الشهور
والسنين وعد ما طيرٍ يطير
ومن لفى طيبه ومن جاها يزور
ختمها صلوا على طه البشير