ماجور ياللي دمع عينك نزايف

هذه القصيدة قالها الشاعر لافي بن نفجان الحربي رداً على قصيدة الشاعر عضيب بن هليل الحربي ورثاء في المرحوم بإذن الله الشيخ محمد بن عوض الحربي الذي وافاه الأجل في 14/7/1424ه في مدينة حفر الباطن.
ماجور ياللي دمع عينك نزايف
عسى الذي تنعاه روحه شهيده
الآدمي لو طال عمره مهايف
لا بد قناص المنايا يصيده
يا بوبدر دنيا توجه قذايف
قل للقلوب الغافلة والعنيده
ياما فجت من مقحمين الطوايف
كم فرقت يا عضيب شيخ وليده
الرابح اللي باعها بيع عايف
وختار لذات الحياه المديده
نصيحةٍ لأهل القلوب العرايف
الزرع يسقى لاحل يثمر حصيده
مرحوم يا شيخٍ سلوكه نظايف
وادع اودع ما تعدى الوعيده
عليه مثلك ماجروحي طفايف
الأمر لله فاعلٍ ما يريده
ما تلف جرحي يالنجيب اللفايف
على رفيقٍ له مزايا فريده
أبو عوض في قمة المجد نايف
راعي العلوم الطيبة والمجيده
له سيرةٍ ما ناشها زيف زايف
با اللازمه يفرق با امورٍ عديده
يوم الخميس اقفت ركابه نكايف
الدايم الله والرحيل لعبيده
جعله يفوز بيوم كشف الصحايف
في صحبة المختار صاف العقيده
آمين يا مغيث الكبود اللهايف
يا عاقلٍ يوسف لعينٍ تريده