يالله تغفر له وتمحى خطاياه

في رثاء الشيخ إبراهيم بن سلامة المعيقل البراهيم رحمه الله:
يالله ياللي بالشدايد دعيناه
الواحد المعبود علاّم خافيه
ترحم لنا شيخاً عزيزاً فقدناه
وتمطر على قبره وتسقي سواقيه
مرحوم يا شيخاً بطيبه عرفناه
عسى الولي في جنة الخلد يجزيه
كل عرف طيبه وجوده.. ومبداه
شيخاً كريماً وما تغيّر مباديه
يا صل ولا يقطع قريبه وينصاه
ياقف على باب المقصِّر ويعطيه
يعطي ولا يبخل كريماً بيمناه
واللي مثل طبعه قليلاً تلاقيه
مرحوم يامن طيبه اليوم شفناه
بعياله اللي طيبهم ما نوفيه
يالله تصبرهم على حر فرقاه
غصباً علينا كلنا اليوم نبكيه
لو ينفدا بالروح والله فديناه
أرواحنا ترخص لمثله وتفديه
ولو الدموع ترد غالي بكيناه
عليه دمع العين ماجف صافيه
ولو الحزن ينفع فرحنا طويناه
ننسى الفرح كله ولاعاد نطريه
مرحوم يامن في غيابه رثيناه
والقول كله والشعر ما يوفيه
«أبو فهد» والله ما يوم ننساه
واللي عرف طيبه فلاهو بناسيه
يالله تغفر له وتمحى خطاياه
وتسكنه جنات النعيم وتهنيه
لكن مقدر والمقدر رضيناه
والموت حق ودربه الكل ماشيه
عبدالعزيز بن عبدالله المنفور
كلية الملك عبدالعزيز الحربية /الرياض - من أهالي منطقة الجوف