جاه الأجل من قبل يوفي صيامه

في رثاء الشيخ عبدالرحمن البطي المتوفى السبت ليلة الأحد 2/10/1420ه.
مرحوم ياللي مات ماكمل إقضاه
جاه الأجل من قبل يوفي إصيامه
مسحر للصوم لاشك ممداه
رقد وروحه فارقت من منامه
رحل عن الدنيا والأحباب خلاه
عسى ملا فيه السعد والسلامه
لو انسيبي كل الأجواد تنعاه
من عقب موته عزز الله مقامه
لو انسيبي تفعل الطيب يمناه
كم حايلٍ جابه إلضيفه كرامه
كم قالة صعبة مع الناس سواه
حلال عقدات تلولس إحزامه
وكم من ضعيف فرَّحه يوم لاقاه
عطاه من ماله وليَّن كلامه
وام اليتامى يطرق الباب لرضاه
ينزِّل الشحنة ويخفي مرامه
يالله يا للي كل حي إبرجواه
يا عازل شمس الضحى عن ظلامه
ان تجعل الجنة مقره وملفاه
وبرحمتك تكفيه هول القيامه
يا فهد انا منساه والله منساه
وانا الذي صادفت جرعت اصيامه
يغز قلبي كل ما جات طرياه
والعين تنثر دمعها من سقامه
ما قلت انا الأبيات لولاه لولاه
حبه ابقلبي زاد فوق العلامه
وصلاة ربي باول القيل واتلاه
على النبي عدة ارشاش الغمامه