ورقة قديمة

واشيب عيني شيبه قلة المال
في ديرة فيها المشاعر قليله
لي ديرة ماعمر سفاره اكتال
حمل الجمل كود بردوم جليله
ما اعرف لرعيه ولاني بجمال
ولاني من اللي يجمعون العديله
شفي على العيرات زينات الاهذال
اللي عليهن يقحمون الدبيله
لا ورد وهن عقلة واديه سال
عقب الظما يبهجن منها الغليله
اشرف رقيبتهن وقال اشرف المال
تقودوهن مع غتار الخميله
ادبهن المدب وراض على الفال
راحت تندح قدمهن كل اصيله
وزاعوا لزينات اللبن حيل وجلال
ويفلس من العشقات راع العصيله
ولحقوا هل البل فوق عجلات الازوال
وردوا عليهن كاسبين النفيله
وحول قفاهم باللقا كل جهال
بمثومنن كنه رعود المخيله
خطو الولد ياتي من المدح مكتال
وخطو الولد تكثر عليه النقيله
تجمعن البيض لمات الاضوال
كل تسمع وش جرا من حليله
أحد يجي من التماديح مكتال
وأحد يجي ما حصل الا الفشيله