محاورة الاسبوع

هذه المحاورة جرت بين الشاعرين المعروفين صياف بن عواد الحربي وشليويح بن سلاح المطيري
صياف
يا مرحبا بالطرقي اللي ديرته ماهي بعيد
اليا مشيت العصر من واد النقيع امسيتها
قلنا لك اخذ البندقية وادخل الوادي وصيد
واثرك ليا منك لقيت الطيبه دسيتها
شليويح
دام البقاء وانته حديدي والحديد من الحديد
وأغني الامثال بالحانك ليا غنيتها
أنته سوات اللي يحول شيك ماعنده رصيد
لو كان تخبر صيد في ديرتك ما خليتها
صياف
انته حديدي مار كثرت المعاند يا عنيد
لولاك ما صلحت سكيني والاحديتها
اقفيت بالثوب القديم وجيت بالثوب الجديد
وتشب نارٍ في قديم الوقت ماشبيتها
شليويح
يومٍ نشوفك فيه يا صياف كنه يوم عيد
وأن كان عندك مشكله ما تنقدر حليتها
سلم المجيدي منتهي بالسوق يا عبد المجيد
وانته قروشك ما تغيرها بعد صريتها
صياف
ياحد عينك يمنا يا ذيب ما دري وش تريد
لوكان اطرف لك يدي من الزعل عضيتها
انته بعد غيرت طبعك لاشقي ولا سعيد
ومن الحسد حتى الدروب العامره سديتها
شليويح
لولاك يا صياف مسلم قلت شيطانٍ مريد
ما تنتهي دعواك لو عند القضاه انهيتها
الحاسد اللي في حياته يستفيد ولا يفيد
لو كان ما شفته بعيني جرته قصيتها
اختيار: زهران عون الله المطيري / بريدة