يستاهل الأمجاد

سعادة رئيس تحرير جريدة الجزيرة الأستاذ خالد المالك سلمه الله
السلام عليكم ورحمة الله وبركاته..
أبعث لسعادتكم قصيدة قلتها وهي من بداياتي الشعرية ومناسبتها تهنئة والدي عبدالله السلوم بترقيته للمرتبة الخامسة عشرة مستشاراً بإمارة منطقة الرياض فآمل إبرازها ملونة في حيز مناسب إن أمكن.
يستاهل الأمجاد يا بوي شرواك
وتستاهل اسمك يعتلي كل طايل
وتستاهل افراح الزمن لا عدمناك
صيتك مع العالم هو اكبر دلايل
حتى المناصب ما بغت ذا ولا ذاك
قالت ابي السلوم واف الفعايل
وشهاد ابي اكثر اذا صرت يمناك
لا قيل ولد فلان وافي الخصايل
لك وقفةً بالطيب ما احدن تعداك
انت عظيم الفعل سمح الشمايل
حب الكرم والناس تفرج عن جاك
قول على فعل يداوي العلايل
منتاب تفعلها لجل عطني وهاك
وبعض العرب قولاً بليا صمايل
انشهد انه ما ندم من تنصّاك
يا لوافي اللي للثقيلات شايل
انا ليا شفت الفرح في محياك
عن كاهلي تنزاح كل الثقايل
ليت العمر يا بوي يعطى ونفداك
وما هقوتي عمري يرد الفضايل
الله دوام انه يسهّل لك خطاك
ويخلي الصعبات عندك ذلايل
وكل الهدف عندي محبتك ورضاك
وحق علي افي ببعض الجمايل
قليل جنسك يا يبه عند مبداك
تمشي على درب الرجال الاوايل
ارجي من اللي معتلي فوق الافلاك
يرع مقامك يا عزيز النزايل
ابنكم/ عبدالرحمن بن عبدالله السلوم