أبرك الحزات رجعة سموك للبلاد

الثناء والحمد للي على خلقه وكيل
فارج الضيقات عالم مضامير الفواد
يوم سلم طايل السباع مزبان الدخيل
نايف اللي ناف بالعرف بعيون العباد
نايف اللي طوع الصعب واصغى له ذليل
نايف اللي واقفٍ دوم درءٍ للفساد
نايف اللي يانتخي لها يشف الغليل
نايف اللي عاشر الطيب في طي المهاد
نايف اللي بالمراجل اليا صعبت كفيل
نايف اللي يا أجدبت صار بالجوده جواد
نايف اللي بالقسى كنه السيف الصقيل
نايف اللي زاد قدره على الطولات زاد
نايف اللي يفتخر فيه معناي الجزيل
نايف اللي عذب الرجل في حفظ البلاد
هو ذرا اللي حده الجور وأنهكه المليل
أشهد أنه للوطن مثل نسناس البراد
كم صحيحٍ يوم غادرت من بعدك عليل
ضايقٍ من لوعته ما غشى جفنه نواد
عايش بظلال جودك عسى عمرك طويل
مسيرك رب الخليقه على درب الرشاد
نادرٍ بالكون واللي على نهجك قليل
عاشقٍ لأسمى المبادي وحصلت المراد
ما تهاب من العساير ورقي المستحيل
وارثٍ من ساد وأفنى شبابه بالجهاد
المليك اللي برز بالسما كنه سهيل
جدد البيعة بنجدٍ وللمجد استعاد
يوم نجدٍ من عناها تجر من العويل
اكتست ثوب مشجر بعد ثوب الحداد
يوم جاها زغرتت له وقالت يالحليل
قال غصب يالعنيده وليتك بالعناد
والثنا والحمد للي على خلقه وكيل
وأبرك الحزات رجعة سموك للبلاد
نواف بن نهار بن خلف الجنفاوي