الإعلام نفخك وياليتها أخطاء إملائية مشرف ملف الشعر لا يفقهه!

اتركي القوافي الصعبة وخليك بالسهلة وعساك تمشين!!

في بعض الاحيان تختلف مع نفسك على شاعر معين عندما تجده «جايب العيد» في قصيدة ما!! وذلك لأنك ومن خلال متابعتك له لم يخطىء خطأ كهذا ولكن فجأة وبدون مقدمات (تلقاه متكيّ) على غلطه كبر (ابانات) والغريب ان هذه الغلطة أتت بعد الرزة الاعلامية التي حصل عليها هذا الشاعر..
نوقف ونرجع للموضوع لأنني ما اعرف استرسل المهم هذا هو فهد المساعد الذي خدمه الاعلام خدمة العمر فأصبح مشهوراً مع انه يحتل المرتبة المتوسطة شعرياً لمن هم في مثل سنه ليس شاعراً فلتة.. ولكنه محظوظ وليس سيئاً له قصائد جميلة.. أما ما اريد ان اتكلم عنه على وجه الخصوص فهي قصيدة جديدة في احدى المجلات التي اتمنى ان تكون الاخطاء التي فيها مطبعية لكي لا نخسر شاعراً قادماً نفخه الاعلام يقول فهد:
قلت انبش هموم وكواليس الاوطان واشوف هالحين في ويش لاهين
ثم:
رابع قناه وشاب من بين نسوان
يشرح لهن بامعان عن موضة ألفين
ثم:
في قلب من له قلب مفعم بالايمان
وفي عين من له زمان الدجى عين
انظروا البيت الاول الشطر الاول رائع جداً أما الشطر الثاني مصاب جداً فالنقص ليس حرفاً أو مداً أو تشديداً، الكسر واضح المفروض يقول غريب المدينة:
(واشوف انا هالحين في ويش لاهين)
كذا يصير تمام.. يابو الشباب.
اما البيت الثاني انظروا كلمة (شاب) يعني رجل في عمر الشباب.. ولكن في هذا الشطر يجب ان ننطقها هكذا (شاب الشعر) والا انكسر البيت فهد جبر كلمة (شاب) أي مفرد شباب لتنطق شاب من شيب لتلائم وزنه.. هذا كلام يا غريب يا مدينة؟!
لو قلت:
(رابع قناة ورجل من بين نسوان)
صار تمام.. تدرون يمكن خطأ مطبعي؟!
ثم البيت الثالث والشطر الثاني منه.. اسمح لي يا فهد 3 أخطاء مطبعية قوية المفروض تقول:
(وفي عين من له في زمان الدجى عين).
النقص نفس نقص البيت الأول حرفان اقول يا ابو مساعد ترى ان طحت ما راح احد يرفعك والغرور نهاية الشاعر وغريب ومدينة.. ومدينة وغريب.. تراها خرابيط انتبه وهالمره قلنا خطأ مطبعي نبي نرقعها بس ترى شي ينترقع وشيء.. مثل مدينه تنتظر رجعة غريب وين مدينة برجول!!
* * * *
فهد السطامي استلم ملف الشعر في مجلة شعبية خبط.. لزق وذهب بعدها مع الريح (Gowith the winde) والسؤال كيف يستلم ملف الشعر رجل لا يفقهه والله دنيا معكوسة.. المهم فهد.. ما هو المساعد خلاص قضينا من المساعد حنا في السطامي الحين.. يقول:
لولا الحلا قد زاد في قدر خامل
ما جيت تسألني غلا يالنبيهي
والله انت النبيه.. يا رجل وش هالكلام الفاضي انت تعرف معنى خامل؟ وش دخل الحلا بالخمول والكسل ما تجي يمكن خامل وحلو.. يا خي وش ذا التشبيه ثم: ما جيت تسألني غلا يالنبيهي..
يا فهد هذا تجميع حروف وصف حكي انا ما راح اتطرق للمقدمة اللي محطوطه لك لان اللي حطها ما يعرف الشعر أو مجامل لك..
اصبر.. اصبر.. أكيد هذا لغز بالنبيه؟
صح عليّ هذا لغز وحله هو.. هو.. ايه عرفته الحل هو المربعانية.
يا شيخ .. اثري ذكي وأنا ما دري!!
يالنبيه؟
* * * *
بنت ابوها شاعرة مثيرة للجدل من بدايتها وقصيدها.. حبه فوق.. وحبة تحت.. ابقى قابلني لو فلحت..
نشرت لها قصيدة في صحيفة يومية وفي احدى نوافذها المعدة من قبل شاعر مسن الله (يهديه) ويهدينا.. لا أريد أن اتكلم في موضوع القصيدة أو فيمن قيلت.. فهذا لا يهمني المهم قافيتها الغريبه والعجيبه..
القافية هي:
تعلوا.. تمروا.. يبتدوا.. تعزوا.. شلوى.. تلهو.. تهقوا.. تلغوا.. تقهوا.. تشكوا.. يتشدوا.. شلوى.. تعلوا.. يا جماعة انا اقول ان الاولين ما خلوا للتالين شيء انتي يابنت ابوها مستحيل انك لا تعرفين الامير محمد السديري هناك قصيدة له بينه وبين زبن بن عمير ليس الموجود الآن بل جده رحمهم الله جميعاً.. كانت تخدمك لو أنك تقرئين الشعر.. واقول قصيدة الأمير محمد هي:
يا زبن عديت الطويله وناديت
وعزي لمن مثلي عليها (تعلوى)
ناديت لي حي على وصله اشفيت
والوت به الدنيا على غير (ملوى)
* * * *
يا زبن يابن عمير ياطير (شلوى)
هل فهمت يا بنت ابوها بان قافيتك لا تصلح حتى للكتابه على الجدران..
التزام الأمير محمد السديري رحمه الله بقافيته تعلوى.. شلوى.. ملوى.. علوى.. بلوى..
وهكذا...
أما انتي فحتى شلوى قد تكررت مرتين في القصيدة قبل البيت الأخير هذا يعد نقصاً في تركيب القصيدة يا بنت أبوها..
مالك ومال القوافي هذي.. وخلي الشعر لاهله والا اكتبي بمفردة سهلة أما قافية (وانا اتلوى) هذه فانها.. خربطة.
mrjaber2001@hotmail.com