لاتكتم بصدرك

ان كان يالهاجوس داعبك الاحساس
من صادق الاحساس اياك تابه
لا تكتم بصدرك محابيس الانفاس
اترك شعور الوسوسه والكآبه
خذ راحتك مانيب من يشغل الناس
حريتك ما ظن فيها طلابه
لو انها عزله من الناس لاباس
معك اتسلى بالشعر والكتابه
ما عاد لي في مجلس الهرج مجلاس
ما دام كلٍ للبشر حد نابه
مجلس جمع ما بين حاسد وبلاس
ما طاب لي لو فيه ربع وقرابه
يا كم نصحناهم من الراس لراس
لكن صدق النصح محدٍ درابه
حتى ووجه الارض يشكي من الفاس
والقبر قدم العين يحفر ترابه
ما ياخذون من العبر درس وقياس
ما يعلمون ان النهايه تشابه
ملوك عقب العز في الحد يباس
عقب المعزه يفتقد للمهابه
تحت التراب وما على القبر حراس
وفي الاخرة كلٍ بيلقى حسابه
احدٍ لدار الاخرة جود الساس
واحدٍ على اللذات قضى شبابه
هيه كذا ويشوفها كل عساس
المدرك اللي طابع الناس شابه
اقولها من بعد ما سيطر الياس
كم من سؤالاً ما لقاله اجابه
- سعد الشقحاء