من ارشيف المراسلات

الا يامل قلبٍ كل ما جا الليل جاه هموم
كما النيشان قلبي للهموم اللي يصوعنّه
اهوجس واتنهت والتنهت عادة المضيوم
واعض شفاي بسنوني غضب واجاذب الونه
على وقتٍ تنحا وانتقضى ما باقى الا رسوم
زمانٍ فات ياليت الليالي لي يردنه
زمانٍ مالحقته بس جاني عنه رد علوم
يبيع ويشتري به راعي السلعة بلا منة
وابا ابدى المشكلة للي علومه مع كبار القوم
جزيلات المعاني لانصنه ما يفوتنه
يعرف المخطية والصايبة زيزوم قرم قروم
ولو ما هو بكفوٍ للمعاني ما تنصنه
انا انشد واتنشد والاجابة عند بن سلوم
وانا عندي خبر عسرات الاريا ما يعسرنه
علام الحر الاشقر بالخضيرا ما يدير الحوم
ولا يرفع جناحه للحباري لو يمرنه
وهو فاللي مضى في ظن بالي صيرم ملحوم
انا ماادري هزل والا الليالي غيرن ظنه
وصلاة الله وتسليمه على اللي من الخطا معصوم
على خير البشر صفوة قريش موضح السنة
وقد أجابه الشاعر عبد الله السلوم رحمه الله قائلاً:
هلا يامرحبا من خاطر المكلوم للمكلوم
رفيقٍ يعجب الفاهم اليا منه قرا فنّه
رفيقٍ واضحٍ معناه من جنس الدرر منظوم
سمى قلبي لتقديره ونفسي منه ممتنة
تذكر ما مضى يوم السلع تشرى من اول سوم
هك الايام يومه مالحقهن كيف شاقنه
وانا افهم مقصده يبي الوفا اللي هالزمن معدوم
كثير البيض لو هن يسمعن به ما يعرفنه
هوى هالوقت يا ناصر يشابه وردة اليشموم
لطيفٍ ريحها بس المرارة فيه مكتنه
وإذا تنشد عن اخباري فلا سرٍ تبي مكتوم
انا قلبي يتوق ولكن ايامي يضدنه
مثل ما قال راع السالفة يالوعة المحروم
يشوف الما ولكن عنه صدفاتٍ يحدنه
الاشغال الكثيره واختلاف الظن والمفهوم
من اسباب ابتعادي عن طريق النار والجنة
اجبتك باختصار ولا لنا في طولها ملزوم
حلاة الهرج في معناه وافكارٍ يبارنه
ارى من واجبي والناس يدفعها شرف وسلوم
رفيق ما وصلته لازم اشواقي يزورنه