آخر بوح قرائح الشعراء في العيد

جزنا وطول الهرج ما فيه اثمره
يابوي وش لك بالهروج الزايده
هذي سواة اللي تعيِّد به مره
يمضي عليه العيد ما أحدٍ عايده
- الشاعر/ مساعد الرشيدي
***
نفسي تشاحن عليك من أمس والبارح
أنا أتقرَّب لشوفك وأنت تبعدني
واجد جروحك ولكن جرحك الجارح
إنِّك تناسى المعايد ما تعايدني
- الشاعر/ ضيدان المريخي
***
أعايدك وإلاَّ تعيِّد بدوني
أنا بدونك ما عرفت أتعيَّد
غيّرت هندامي وشكلي ولوني
لرضاك وإنت لكل غلطة تصيَّد
- الشاعر/ فهد السياري
***
من يوم صار العيد زحمة رسايل
صار الفرح بالعيد تحصيل حاصل
اللي نسى معذور والشك زايل
واللي يواصل حقّه إنَّا نواصل
- الشاعر/ زايد الرويس
***
يا سيّد أبيات شعري في قصيد الغزل
عيدك مبارك عسى عيدك يعيد وسعيد
أتنفّسك وأعشقك وأهواك ولا أزل
فالعيد لا شح شوفك قلت ماهوب عيد
- الشاعر/ عبدالعزيز الفراج
***
يا ليت لي قلبٍ من العيد للعيد
ما ينتظر على أمل يلتقي به
العاشق يسوِّي لقلبه مواعيد
هذي سواة اللِّي يضيّع حبيبه
- الشاعر/ بدر الظاهري
***
عيدي مواجهك لا شفتك وعايدتك
وما استطعم العيد كانه مر من دونك
عهد خذيته على نفسي وعاهدتك
ما أعايد الناس قبل أعايد عيونك
- الشاعر/ مرزوق الروقي
***
وشلون نعطش له وإذا جاء نصومه
وكيف نتعايد لا رحل بالقصايد
ما دامنا من (حول) نرجي قدومه
مفروض لا منِّه رحل ما انتعايد
- الشاعر/ ياسر التويجري
***
بيني وبين العيد تشرق معي شمس
مع نورها كل يوم فجرٍ جديدي
قام القصيد وفز لعيونها الهمس
هي ملهمة روحي وبسمة قصيدي
- الشاعر/ محمد العريعر
***
صباح العيد لامر الأماكن
تسيل الشمس من فوق الثرى ضو
صباح ثنين زعلانين لكن
صحو بدري من الشوق وتراضو
- الشاعر/ علي الضوي