مخطي وصايب

يالله يا مجري ذوار الهبايب
يارازق الواد المحل بالسحوبي
الواحد المعبود جزل الوهايب
رب الملا والمطلع بالغيوبي
يا رافع عن المصاب المصايب
يالله يا ساتر جميع العيوبي
يا قابل التوبه لمن جاك تايب
يالله يا غافر جميع الذنوبي
انت المعين بنازلات النوايب
يا خير من يدعى لكشف الخطوبي
تزيل عني موجعات صعايب
من فعلهن ضاقت علي الدروبي
اقفت زهور العمر واصبحت شايب
والعمر في حكم الحكيم محسوبي
وعاصرت بالدنيا زمان العجايب
عصر لقيته مثل ليل صلوبي
مسايره لين انكفن الركايب
واحاوله باللين عيا يتوبي
واسوق الاريا بين مخطي وصايب
حتى تعبت وفاختن الذهوبي
وحسب اعتقادي معظم الوقت عايب
وسبب عيابه ناقلين العيوبي
احد حضر جسمه ومبداه غايب
واحد لغيره دون تفكير لوبي
وبالناس من يسعى لعوج الطلايب
رايه يعاند فيه لوهو كذوبي
برايه يحب معقدات النشايب
وهذ المرض سبب خراب الشعوبي
وقت ليا فكرت كله غرائب
ليا بغيت الحق صار محجوبي
حيرت فكري يا زمان العجايب
عجزت لاشرح قصتك في سلوبي
أحد ضعيف الراي مهزوز خايب
وأحد مهماته كذوب لسوبي
وأحد يعرف العلم لاشك هايب
ساكت ويجامل ميتين القلوبي
تم الكلام وصدرن النجايب
والشمس مالت ونتحت للغروبي
وصلاة ربي عد وبل السحايب
وما با لفضا من غالب ومغلوبي
على نبي كل ما قال طايب
العادل المختار خير محبوبي
- علي بن زيد الفريدي