أغلا الحبايب

لا تقول إحسب احسابك للمصايب
مرخص الدنيا وبايعها عشانك
لو حسبت احساب لسهوم الحرايب
ما سمعت أحلى السوالف من لسانك
مقتنع وادفع على حبك ضرايب
خلني هايم وسط خضرة جنانك
ليش خايف.. وش بلاك اليوم هايب؟
ما خلق من هان محبوبك وهانك
خل عنك الحزن.. وهموم النوايب
وارقد آمن ما حدن ياصل مكانك
انت عالي منزلك فوق السحايب
ورافع رب السماء قدرك وشانك
جيتك أسبق من ذعاذيع الهبايب
فرّج همومي.. وظللني بأمانك
عاشقك باع الحبايب والقرايب
واشتراك وتحت تأشيرة بنانك
عاشقك لو شاف من حبك عجايب
ما يبي غيرك.. ولا يرضى هوانك
عاشقك لو راحت ضلوعه حطايب
ما يخون وعن ظنون الناس صانك
انت دنيايا واجل يا أغلا الحبايب
فيض لي من نبعك العذب وحنانك