هجيت باب القصيده والمساء غير وتشكلت من سمو الفكر صوره طاحت على صدر كراسي نواوير واعشوشب الشعر وانعشني زهوره الشعر له في زوايا القلب تقدير يقلط بالأعماق والأعماق سوره في عقلي ألقاه لإحساسي مضامير وفي عيني ألقى شموخي في سطوره غالي وعندي من خيار المسايير وافخر ليا نوّر إحساسي بنوره للشعر تأثير ماهوب أي تأثير صوته صداه المسرّه والخطوره شاعر يخلّد وتطرب له جماهير وشاعر قصيده مداه حدود زوره دنياك ما هي على كيف المناعير كم واحدٍ شاف من دنياه بوره أذعن وطاوع لغارات المقادير وصافح يمين القدر لو ذاق جوره بعض المشاهير لو كانوا مشاهير ما ينفعونك بحزّات الضروره يبين لك صاحبك وقت المعاسير والا الرخاء ما يبيّن لك شعوره رجّال تشبع هقاويه الطوابير ورجّال قمّة طموحاته فطوره ورجّال يكفيك في كل المشاوير ورجّال ستره غيابه عن حضوره - الشاعر/ عبدالعزيز الشهيل
