هواي الطيب

ياليت للخفاق جنحان ويطير
كل الهموم تمر واستوطنت فيه
ماعاد فوق الأرض منهاج للسير
وإن زاد حال القلب بيّح بخافيه
يرقا سما ويباري النجم والطير
لو الهوى يمكن يجدد طواريه
ماهو هوى طرد البنات الغنادير
كم فالعرب غالي شكا فقد غاليه
أنا هواي أخزم خشوم المعاسير
وأدور الكفو المسمّى واماريه
وأنا هواي الطيب بين المناعير
واللي وفا في لازمي لازم أوفيه!
أغلب كلام الناس شوك ومسامير
والخلق كلٍ فيه عيبٍ مكفّيه
هذا الزمن ما يتعبون المداوير
حتى نعم بالمال ف السوق تشريه
فيه البشر تعطي ما تقبل معاذير
والصدق تلقى من يحرّف معانيه !
والنيه اللي مثل لون المغاتير
يمكن تعوّد بالعتب والمشاريه
أصبح عزيز النفس من دون تقدير
ولا ضعيف النفس كبرت هقاويه
ما عاد تفرق راعي الشر والخير
والبشت يمكن يلبسه غير راعيه
مات الضمير اللي رضا دهنة السير
وقتٍ يصيد الحر عنوه ويشويه
لازلت ثابت مثل ما يثبت النير
اجرع مرار الوقت من شان حاليه
قلته وأنا راضي بحكم المقادير
ما قدره رب المخاليق راضيه