ماجد هواش السليمي الحربي

الخطوب العاتيات

مرثية في المرحوم بإذن الله رئيس مركز الذيبية الشيخ رباح بن طعيميس بن مريخان
فزيت لو قلبي ثقيلٍ مرازه
وجضيت لو ماني عليها من الريق
وعمّر بقلبي للطواري محازة
وتفتحت صمّ الضلوع المغاليق
وعنّزت للي معجزة من إعجازه
تدبير شون الكون باوثق مواثيق
مومن ولا لي غير ربي عنازة
مسلم وسلّم لامر رب المخاليق
لو للخطوب العاتيات اهتزازة
ومهاويٍ يذهل بها الفكر ويفيق
جرح السنين الجرد كسرة قزازة
ويعتّقنّه سود الايام تعتيق
و يوعز ويظهر بالمشاعر إيعازه
و يطلّع اللي يكنزٍ الصناديق
مرحوم يامن لا نصيته لعازة
يطلع لها طلعة عتيق المسابيق
رباح له من كل جزلة خزازة
خزايزه لويكثرون التفافيق
درعٍ عن الشدة حصين حرازه
وراسٍ تصادم فيه روس العماليق
وذخرٍ لنا عن كل عازة ركازة
وفخرٍ نباهي فيه زود المطاليق
عزيز قوم وعزوته واعتزازه
باللي يحطنه بروس الشواهيق
شيخٍ وريث شيوخ ماهو لزازة
مقدم هل العرفا جمال المعاليق
يوم انها بين القبايل حزازة
عنهم يحطن السباع المداريق
ياما اسندوا دينٍ لدين عزازة
على النقا محدٍ نقابه ولا سيق