ملك وانجازات

ساعد اللي جا يحث خطاه ويسوق الأماني
يا كريمٍ ما على فزعتك خوف ولا استحالة
يا عظيم ما يخيب اللي رجاه ولا يعاني
والقصائد مملكة والمملكة هي راس ماله
والفهد سور الملوك وسيف ذربين اليماني
مرَنا عشرين عام وحالنا يا نعم حاله
في ذرا شيخٍ جمع كل المكارم والمعاني
انقضت عشرين عام ومجدنا ترزم جماله
انقضت ما كنها إلا جملة أيام وثواني
وشيخنا اللي كل ما يثقل عظيم الحمل شاله
مرتكٍ ما كنه إلا طويق في وجه الزماني
وارتكى لهموم شعبه واحتزم به واعتزا له
واعتلا به هامة العليا إلى سهيل اليماني
رائد التعليم راع العلم وافية خصاله
قادنا للمعرفة والعلم في كسب الرهاني
خادم البيتين حاميها ومكرمها بماله
باذلٍ جهده لراحتها وراحة كل عاني
الزعيم اللي تزعم في العرب طيب وعداله
الزعيم اللي جمع كل المعاني بالمثاني
ان ضحك غيثٍ يسوق الخير من مردم أخياله
وإن عطا ما كنه إلا الما على جرد السواني
وكل كايد سخره والعالي أقبل وانحتى له
وكل نازح عن يدين الشيخ صار اليوم داني
والوطن عزه سنود وطيبٍ حاله وفاله
دام من دونه رجالٍ يحتمونه بالسناني
وحّده من جعل خده في جنان الخلد داله
ويحفظ الله له ملوكٍ شايلينه في المحاني
يوم أبو تركي تعزوى في اربعين من ارجاله
كل من هم مرخصٍ روحه ومعطيه الثماني
لين عانق ريح نجد وضمها وأوثق احباله
وأمرحت بحماه والبسها السكينة والأماني
واستقر به الأمان وعانقت سهله جباله
واختلط فيه البختري والنفل والقحوياني
وارتحل عنها وعقّب شيخنا خيرة عياله
صفوة ملوك العرب خيرة عريبين المجاني
واكتمل عشرين بيت لشاعرٍ يهدي جزاله
للمليك اللي حكم عشرين عامٍ كالثواني
من رخاء في عز وأمن وجاه وأمجاد وشكاله
وازدهار ونهضة وعمران واسطول ومواني
يا الله التوفيق من عندك ويا رب الجماله
جمّل اللي جا يحث خطاه ويسوق المعاني
نايف المطيري