رثاء في عادل القاضي

قصيدة رثاء في الفقيد الغالي والصديق الوفي المرحوم بإذن الله عادل بن عبدالعزيز القاضي المتوفى في يوم الأحد 3-7-1432ه.
مالوم عيني لو تدامى هميلها
أرجي عسى المولى يهون جفيلها
ذاله ثلاث أيام وإن نامو الملا
سهرت إلى ما الصبح تبكي خليلها
تبكي على شهم المروات والوفا
تبكي على صفوة تميم ونبيلها
مالومها تبكي على نادر النبا
يوم الاحد وارى الثرى هو نزيلها
بام الحمام ضم اللحد مهجة لنا
يا الله عسى قبره رياض تحيلها
يا سامع (ن) دعواتنا يا مجيبنا
برحماك يارب البشر يا كفيلها
إلهي أسألك تنزله منزل الرضا
يا الله عساه بجنان ظل ظليلها
الدار تبكي واي دار (ن) بكت لكم
لمثله تبي تبكي ديار يجيلها
تبكيك نجد يا ضنى نجد كلها
وعنيزة الفيحا رثتك ونخيلها
ويبكونك رجال الوفا يا وفيهم
نبراس مجد وعزها يا سليلها
إلهي اسالك تجبر عزانا بمن رحل
عنا وخلا الدار تفقد دليلها
عليك بالي كل ما ساح والتهى
عيت عليه العين يبعد مخيلها
لابد من ذكر الحساني بموتنا
ولابد من ذكر الرجال وحصيلها
كم من يتيم شال عنهم عنى الدهر
وكم عيلة بعد الولي هو كفيلها
وكم زاح من هم جثم كنه الجبل
عن صدر من لا يحتمل ما يشيلها
وكم كربة سعى لها لين فكها
عن كاهل (ن) تقطع رجا من يخيلها
دنيا كفانا الله شر امتحانها
تسقيك من كاس الردى حنضليلها
إن كان قفت لا تحاول تردها
خسران يا من يعترض في سبيلها
وإن اقبلت تعطيك وجه من الرضا
وتسقيك من كاس العسل سلسبيلها
ينغر فيها من غري في جمالها
وتخدعك في لين الفراش وخميلها
سبحان رب (ن) ما وعد غيره البقا
سبحان خلاق الخلايق مزيلها
ما شاور الموت البشر في نفوسهم
إلا النبي استأذنه في رحيلها
عقلا بن عبدالعزيز العقلا