الولاء عهدٍ علينا ما نخونه

لا تحسبون الوطن يلقى بداله
كل منهو ما يحطه في عيونه
والله انه فيه نوع من جهاله
من يسلّم لحيته لّليً يبونه
يستحق اللي يجيه وما جراله
الفتن واهل الفتن لا يهدمونه
اهل الاطماع وفلول الضلاله
خص منهي مثل دولتنا المصونه
مهبط الوحي المقدس والرساله
الملك من دونها والشعب دونه
وكل رجلٍ بالولا يوصي عياله
صفنا من دونها ما يدخلونه
ولا يزعزع صفنا شلّة حثاله
وهيه ياللي طبعنا ما تعرفونه
من عطاكم باسمنا عنَّا وكاله
تحسبون الشعب دمي تحركونه
وتحسبون ان من بغى له شي ناله
الولا عهدٍ علينا ما نخونه
وافيين بالعهد حتى الثماله
دورو غير السعودي تقنعونه
السعودي تو من يومين قاله
ما يبي منكم تدخّل وسط شونه
ولا يبي فزعه من اصحاب العماله
لعبكم مكشوف لو ما تكشفونه
لو تغطونه من انواع الحياله
ما يطيع عداه فاللي ينشدونه
لو رغبتو كسب وده واستماله
التلاحم بيننا ما تضعفونه
من جنوب الدار لين اقصى شماله
ومن بحرها للبحر ما ترهبونه
تحت ظل اللي مظللنا ظلاله
ذي مشاعر شعب ما يرضى المهونه
ولا يبي حكمٍ سوى حكم العداله
والختام عداد ما هلت مزونه
يا صلاة الله عليه وكل آله
الشاعر - هاجد صنيدح السبيعي