يمناك بالمعروف دايم سبيقة

بك ياسنا الدار العزيز وبريقه
رحت وتحرينا رجوعك على نار
وصدرونا من غيبتك مستضيقة
وضاق الفضا من ضيقة الشعب واحتار
ما فيه نفسٍ حمل بُعدك تطيقه
فعل الحزن من روحتك بالصدر جار
والعين من دمع المفارق غريقة
هم ابتعادك درب عن الف مشوار
على قلوب الشعب ما اطول طريقه
كل النفوس كفوفها ترجي البار
من قلب واحساس ومشاعر رقيقة
تدعي لكم يا سيدي سر واجهار
في كل حين وكل وقت ودقيقة
انه يجيرك من صواديف الاقدار
يا مبتغى الحكم السديد وعشيقه
رجلك وطت ارض الوطن خير وامطار
قفر الاراضي فيك صارت حديقة
خبر رجوعك للوطن والصدر سار
استبشرت فيه الصحف والخليقة
حبك ملا هالكون في كل الاقطار
واسس علاقة بالترابط وثيقة
خيرك يابو متعب على كبار وصغار
بنيت لك بالجود قمة عريقة
محدٍ لحق طيبك ولو صار ما صار
يمناك بالمعروف دايم سبيقة
بذلك مطر همال للشعب مدرار
وحجان جودك للمكارم طليقة
حلم القلوب: انك تجي, تنور الدار
واليوم زال الحلم واصبح حقيقة
الله يمد بعمرك سنين واعمار
ولا يمسك يا ابيض الوجه ضيقة
فيصل بن سبيّل الباهلي