واصدحي يابلابل وارقصي يازهور لوحة (الحب) خطّي في جبين الخيال فرحة (الشعب كلّه) في (بهي الحضور) أشرقت لك (هلانا) فوق روس الجبال والتراحيب سالت من جميع الثغور يا(أبونا) (فقدنا) ميلة (أعدل) عقال فوق راسٍ بطيبه والشجاعة جهور في غيابك نسينا كيف يظهر هلال وانذهلنا بدونك كيف مرّت شهور والمواجع تسابق يمّنا للوصال والمدامع تعانق من ألمْها النحور واصبحت هالدقايق في غيابك ثقال بانتظارك وامَلْنا كنّها ماتدور في غيابك وشعبك كلهم ف(ابتهال) وفي رجوعك سجدنا للمجيب الشكور نحمد الله رجعت وكل ما كان زال عاضك الله بضيمك كثر أجر وطهور (دامك بْخير) (عنّا) يا (ملك) لاتسال حن بخير وسعادة وابتهاج وسرور بُشِّرت بك مداين وانحنت لك تلال وانورت بك وجيه وشُرِّعت لك صدور والرياض البهيّه في دلال وجمَال جت تمايل لعينك بالنَّفَل والبخور والدروب استحالت ورد ثم استحال تحت خطوة قدومك ياملكنا عطور كل بيتٍ ينادي (ياسعَدْنا) تعال لك كرامة وواجب لو نهاب القصور والمجالس غشاها ريح فوح الدلال والصدور الزكيّة (بنّها) لك يفور ياذرى الشعب شعبك والعرب في جدال بين روسٍ تطيح.. وبين شعبٍ يثور والدول في دواير.. واسئله.. واشتعال ناس حول القبور.. وناس وسْط القبور ماركع لاي فكرٍ يستبيح الحلال ماسمع لاي نذلٍ بالخيانة يشور زاد حبَّه لأرضه واعلن الانعزال عن دروب التناحر والفتن والشرور واجتمع حول حدَّه والملك بالرجال واصبحوا دونك ودونه على شكل سور من صفاتك خذينا يا عظيم الخصال الوطن مايسومه كل شهم وغيور والولا لك من اول ياملكنا محال لحظة الجدّْ فينا يعتريه الفتور في أمان المهيمن يابلاد الكمال احضني من لفى بك بالشّعِر والشعور من قضى بك حياته في كفاح ونضال لين مجدك تعلَّى فوق كتف الدهور (الوفي) له علينا جزيته بالمثال نحتفي به ونبني للتلاحم جسور من زرع عود طيبه (بشّره) بالظلال ومن تقرَّب لشعبه جاه في كل دور أرحب ارحب ويرحب سيدي هالقبال الظلام بوصوله شع للكون نور عيّدي يارياض وحلِّقي بالخيال وامطري ياسحايب وازهري يازهور خطي الحب قصه في جبين الليال بين شعب وحكومة لو علينا تدور الشار- أحمد بن سارح
