نعم بالشعب الوفي.. نعم باللي له يقودي

وعد برق له بجوف المزن نوفى ولميع
الف مبروك لدار سعد وآل السعودي
وألف مبروك لشعب السعودية جميع
اشرقت شمس الوطن يوم جاخير الجدودي
يوم جا عبدالعزيز البلد صارت ربيع
خلف املوك وصل صيتهم كل الوجودي
صانعين المجد نعم بهم نعم الصنيع
نعم بالشعب الوفي نعم باللي له يقودي
خادم البيتين بقلوبنا قدره رفيع
قايد لامن وعد يوفي بكل الوعودي
يا عسى شمس الفهد نورها دايم سطيع
وأبومتعب له عضيد حفظ كل العهودي
يسلم اللي بالعطا والكرم ماله نزيع
وأبوخالد عزنا هو عمى عين الحسودي
أبوخالد لاجل عز الوطن روحه يبيع
قبلهم خالد وفيصل ومن قبله سعودي
كل شيخ ما ذخر قدم اللي يستطيع
مانكر معروفهم غير حساد جحودي
حاقد ما بين الأضلاع له قلب وضيع
الرخا عم الحضر والبوادي والوفودي
عم شيابه وشبانها حتى الرضيع
وين ما يممت تلقى إلا من فيها يسودي
لين صار الذيب سرحان حارس للقطيع
المصانع شيدت والمزارع والسدودي
شرقها مع غربها يربطه خط سريع
والمشافي والمدارس على النهضة شهودي
ذي حقيقة واقعة ما هي أخبار تشيع
شاهد الانفاق تخبرك عن بذل الجهودي
كلفت مال وتعب كلفت جهد فضيع
يسلم القايد فهد واليمين اللي تجودي
تبذل الغالي ولا تبتغي منا رجيع
قايد النهضة فهد لبّسه أغلى العقودي
لين صارت مثل بدر السما شكله بديع
مالنا وأعيالنا للسعودية جنودي
لا دعا الداعي غدينا لها حصن منيع
ويل ويل اللي تجاوز علامات الحدودي
بشره بالموت قله ترى ا لخاين يضيع
عن ثراها عن سماها عن ابحوره نذودي
خادم البيتين يامر وحنا له نطيع
كل لحظة في خفوقي محبتها تزودي
يالله أنك تحفظ المملكة وأنت السميع
ارفع الهامة فخر وافتخر حيثك سعودي
حيث دارك فضّله صاحب الكون الوسيع
منصور بن عبدالله المجيدل - الرس