على الهجن درهامٍ وزرفالي

السفن باسمه على الأمواج مجريها
ويوم الوطن له مكانة عندنا غالي
ذكرى عزيزة نمجِّدها ونحييها
له قصة رائعة تروى للأجيالي
وشلون صارت من أولها لتاليها
قصة زعيم مظفَّر ماله أمثالي
ما حد يصدق بها من هول ما فيها
هاذاك عبدالعزيز ملحق التالي
شبل من أشبال نجد اللي ربو فيها
فارق بلاده وآخذ له فترة جالي
بعض البشر تحسب انه صد ناسيها
يوم الجزيرة شتات ما لها والي
تلعب بها الريح قاصيها ودانيها
يوم الجزيره يفكر ما ابتعد سالي
يفكر بها كيف يحكمها ويحميها
يتابع أخبارها في كل الأحوالي
لحظة بلحظة همومه من شكاويها
ما عنده خيار بين المر والحالي
إلا المخاطر يسوق الغاليه فيها
وصمم وغامر وسار بدبره الوالي
ثم اتجه للرياض وسار ناصيها
معه مغاوير نجد شيوخٍ وابطالي
ستين رجّال للصعبات ناقيها
يمشي بهم في السمايم وأشهب اللالي
شفه يحقق منى النفس وطواريها
تمر ولبن مونته ما ياجد المالي
والكل روحه فداء للموت مهديها
يسرى بليلٍ ونور الشمس مقيالي
نفسه عن الناس والانظار مخفيها
يسري على الهجن درهام وزرفالي
هجن سريعات وخفافٍ مواطيها
حتى وصل للرياض وسورها العالي
وعجلان ظنه متقيته حواميها
ثم رسم خطة للتو في الحالي
ورتب رجال تفيده يوم يدعيها
وقت الفجر من قبل ما يذن التالي
حاطو بدار هدفهم راس من فيها
وردوا ظمايا وجا للقصر زلزالي
والكل نفسه بوسط الموت راميها
وسلوا سيوف تخيف وتشعل اشعالي
في الليل تشبه بروق في مناشيها
وشلف تلظى على الأرقاب تنهالي
من فعل أهلها حمار الدم زاهيها
وكبر معزي وبالسيف الحدب جالي
جثة خصيمه بحد السيف مرديها
وتحقق النصر خامس شهر شوال
واستبشر الناس حاضرها وباديها
الدار جاها ابنها المقدام والغالي
نفسه بحب الوطن والدين غانيها
جاها فتى نجد حر ما كره عالي
واهتزت اركونها يوم اصطفق فيها
أسطورة العصر شيخ ماضي الأفعالي
صقر الجزيرة وأسدْها ضد أعاديها
أسس لنا دولة ماجت على البالي
ما حد يصدق بها لو ما مشي فيها
وعنها الجهل التشتت والخطر زالي
بالسيف والعلم والتوحيد بانيها
العدل والأمن فيها مضرب أمثالي
من جار وقته يجي زابن وناصيها
الأمن وسط المدن وأيضا الخلا الخالي
الذئب يرعى الغنم ما يلتفت فيها
هاذي من أسباب أبوتركي والأفعالي
أهل الفتن والجهل منها مصفيها
وآرث لنا ملوكنا هم نعم الأشبالي
ما يختلف نهجها أولها وتاليها
سعود رجل الكرم حمال الأثقالي
تشهد له الناس دانيها وقاصيها
وفيصل زعيم التضامن ما به جدالي
جروح الأمة معالجها ورافيها
وخالد حميد السجايا صافي البالي
الرب مرضيه وأيضا الناس مرضيها
عسى لهم في جنان الخلد منزالي
جنات عدن تسيل أنهارها فيها
ويبقى الفهد للمواطن عز وظلالي
في عهده المملكة نالت أمانيها
الشعب عنده بعيد الناس وموالي
ما رد شكوى المواطن ما نظر فيها
والتوسعة للحرم من عالي العالي
ضخم المشاريع أسسها ومنشيها
فهد الزعامات في شطات وأهوالي
رجل الحرائب يولعها ويطفيها
وولي عهده لنا ملجا عن الصالي
الناس ما هو بفعل الليث خافيها
للسلم سلم والعيال عيالي
يلطم خشوم الأعادي ما يداريها
وللشعب غيث نقي ماه وزلالي
أفراد شعبه جلس يسمع شكاويها
وسلطان رجل المواقف طيب الفالي
حدودنا واقف بالجيش حاميها
كفوف سلطان غيث حين تنهالي
ارض يجي حولها يسيل واديها
ملوكنا ملتجا من صكه الجالي
من أجل الاسلام ما كلت مساعيها
أبوابهم مشرعه للشعب مدهالي
الحب للشعب من أسمى مباديها
المملكة كلها من زارها اهتالي
شاف التقدم شملها واكتمل فيها
فيها الطرق عبدت بسهول وجبالي
تسر ناظر مشاهدها وماشيها
صرح توحد بعز عبر الأجيالي
المملكة زان حاضرها وماضيها
ياالله ياالواحد اللي فوقنا عالي
تعزّ حكامنا وتذل أعاديها
الختم صلوا عدد ما هل همالي
على النبي داعي الأمة وهاديها
عبدالله بن حمد بن سلمان السبر