عليه اجر الصوت

راع الهوي مجبور لاتعذلونه
من قال كيف الحال ماله ومالي
مثلي لزوم الناس ما ينشدونه
يدري بي الله ربي اعلم بحالي
اباطلبه دام البشر يطلبونه
عسى يرد اللي بحبه صفالي
وانا عطيته عهد والله مخونه
اللي ليامني سهرت وطرالي
اصبح وموق العين تهمل مزونه
مانيب والله عقب فرقاه سالي
والله ولا رضالي بمحبوب دونه
الله ياوقت منول مضالي
يوم الهوي يكبر وتثمر اغصونه
عليه اجر الصوت مما جرالي
واجاوب لورقة الحمام بلوحونه
خلي سلب عقلي بكثر الدلالي
اموت واحيا يوم ناظر عيونه
عز الله ان كان مثل الهوالي
ولاكنت متصور حياتي بدونه
اقفى وصار الحزن هو راس مالي
قلب العناء قامت تزايد اشطونه
راح الحبيب وحزني اللي بقالي
يضوي على قلبي تشيله اغبونه
والله ليبطي بين الاضلاع غالي
عهد الغضي مادمت حي لصونه
ملفي حمود العتيبي