محاورة الأسبوع

هذه المحاورة جرت بين الشاعرين حبيب دغيم العازمي العتيبي وزميله الشاعر فيصل بن منصور الرياحي البقمي
حبيب:
جيت ابحرك حضن واليا الرياحي مرتكي له
لو تحرك حضن طاح.. وطاح ابن منصور فوقه
والعرب من سابق الدنيا على مذهب ومله
كل رجالٍ على قده تكمل له حقوقه
فيصل:
يا حبيب لا تكلف والجبل خله محله
الجبل ثابت ما هو رمث تجود في عروقه
معركه بين الرجال ومن معه سيف يسله
ما بلشنا بالجمل سوق الجمل والا نسوقه
حبيب:
يا الرياحي لا يضيع العلم تال الوقت كله
الصديق اللي صفا لك في زمانك لا تبوقه
خل عينك للنجوم اللي على راسك مطله
والخيال اللي تخيله لا يغرنك بروقه
فيصل:
العلوم الثابته ما عاد تحتاج الأدله
والصديق ليا صفا ما يختلف ذوقي وذوقه
ما تغيرت النجوم ولا حصل فالكون خله
وان نثرنا الما على البيدا يحوقه من يحوقه
حبيب:
زلةٍ منا ومنكم تعتبر زله بزله
وأعرف ان الشرع حكمه يقطع اليمنى السروقه
مد حبلك يا الرياحي تعقده والا تحله
الجمل ماشي على دربه ولا شيٍ يعوقه
فيصل:
أنت تعرفني وأنا اللي كل علمٍ فاطن له
والنحاس مع الذهب لو يجتمع تعرف فروقه
بعد علمتك شروط الدين صل الفرض صله
وانتبه لا تحتمل فالوقت حمل ما تطوقه
اختيار/ زهران عوان الله المطيري