محبوبك قريب

أدري إن الشوق هزك وطير بك حمام
وأدري إنه كسر الشوق غصنك يالرطيب
جيت تتهادى تمايل تقل مابك عظام
ياصبر أرضك على خيزرانك يالحبيب
جيت يادنيا المحبه.. ويادنيا الغرام
لا تغيب الله يخليك ليه لا تغيب
عام من يصبر على البعد.. والأحباب عام
دامني بعدك وأنا من طبيب إليا طبيب
لك عيونٍ كل ماشفتها قلت: بينام
وأثرها عيونٍ تحد السهر بعيون ذيب
وين رايح ؟ تو ماجيت يابدر التمام
شوف كيف أستأنس الليل والكون الرحيب
أنت من جدك بتمشي حبيبي أو كلام
شف كذا تراك ضيقت بالي يالحبيب
أدري إن الخوف يجتاح قلبك في سلام
وأدري إن الليل يربك ومحبوبك قريب
بس واللي شبك الليل بخيوط الظلام
إن هالليلة هي الصح والباقي صليب
بدر الظاهري - شاعر سعودي